Hili Aniceto Ba PPN, CNRT Konsidera Ilegál
Naunil Media (Díli), Vise Xefe bankada Congreso Nasionál Reconstrução Timor (CNRT), Aderito Hugu, hateten aktus tentativa ne’ebe bankada FRETILIN, PLP no CNRT halo ne’e illegal, tamba Prezidente Parlamentu Nacional Arão Noé de Jesus da Costa Amaral legalmente sei iha.
Vise Xefe bankada CNRT, Aderito Hugo, ba jornalista sira iha Uma Fukun Parlamentu Nasionál, Tersa (19/05).
“Aktus ne’ebe desde horseik no ohin tentativa halo ne’e illegal. Ita bele hateten, tuir loloós teknika admistrativa, halo kontazen, maibe buat hotu rejimentu mak sei haruka, durante ita la priense rekejitu parlamentar, dalan ikus no desizaun final mak Tribunal Rekursu, tamba aktualmente Prezidenti legál sei iha, prezidenti eleitu iha 2018, ida seluk laos legalmente ohin hili”, hateten Vise Xefe bankada CNRT, Aderito Hugo.
Xefe bankada FRETILIN, Aniceto Guterres eleitu núdar Prezidente Parlamentu Nasionál foun, hateten desizaun elisaun ne’e mai hosi deputadu nain 40 mak fó votus a-favór hodi truka fali Prezidente Parlamentu Nasionál Arão Noé de Jesus da Costa Amaral no iha votasaun ne’e la’os bankada FRETILIN, PLP no KHUNTO de’it maibe bankada seluk mos fo votu.
“Rezultadu votasaun ne’e ohin la’os bankada tolu iha plataforma ne’e de’it, maibe bankada seluk mos fó votu hotu, nune’e ohin Prezidente foun eleitu rezultadu fó sai ona no tuir votu ne’e hau mak Prezidente Parlamentu Nasional Agora”, hateten Prezidente eleitu, deputadu Aniceto.
Prezidente Parlamentu foun ne’e akresenta, kuandu Prezidente Parlamentu Nasionál Arão Noé la fó fatin ne’e prosesu ketak ida.
“Prezidente Parlamentu Nasionál atual la fó ne’e buat ketak ida, ne’e prosesu seluk. Ohin ne’e la’os hadau de’it, tanba iha Parlamentu Nasionál ne’e maioria mak manda, sa tan ohin ne’e 40 votus”, tenik Nia
“Prezidente Parlamentu Nasionál atual Arao la fó fatin ne’e problema ninian, Prezidente Parlamentu Nasionál atu rua ga tolu mos hau iha lejitimidade liu, tanba hau ohin iha 40 votus, se nia (Arão) hela ho votu 23 ou 24 de’it ne’e nia sei iha lejitimidade par sai Prezidente, lae ona !”, dehan Nia.
Nia dehan, “Plenária tuir mai, hau mak sei lidera, tanba ne’e kinta agora hau sei konvoka konferensia líder bankada”. Uar
