COVID-19 Iha TL : Suspeitu Nain Sia Hein Teste Konfirmasaun
Naunil Media (Díli), Liuhosi Sala Situasaun, porta voz Sentru Integradu Jestaun Krize (CIGC-Sigla Português) dr. Rui Maria de Araújo, informa surtu COVID-19 iha Timor-Leste (TL) hahú hosi fulan Marsu to’o Maiu tinan ne’e, CIGC halo teste laboratóriu ba pasienta nain 1565, negativu hamutuk nain 1532 no hein rezultadu teste konfirmasaun nain sia (9).
Porta voz CIGC, dr. Rui Maria de Araújo, ba jornalista sira liuhosi komunikadu imprensa, iha Centro de Convenções de Díli (CCD), Kinta (28/05).
dr. Rui Maria de Araujo, informa totál rezultadu kumulativu ba ezame laboratóriu ne’ebé hahú iha loron 6 Marsu to’o Maiu agora total hamutuk nain 1565, hosi kazu hirak ne’e negativu 1532 no hein rezultadu laboratóriu nain 9, kazu pozitivu agora laiha.
“Amostra ne’ebé ita foti liuhosi triajem, hahú hosi fulan Abríl to’o mai agora (Maiu) ne’e hamutuk 63 no hosi rezultadu ne’e hatudu 100% negativu. Iha fulan Maiu nia laran rezultadu hosi teste amostra vizilansia sintenela totál 820 hosi totál ne’e 100% negativu”, dehan porta voz dr. Rui Maria de Araújo.
Tuir dadus ne’ebé agora rejista iha kuarentena 105, hosi total ne’e 24 auto-kuarentena iha Díli, nain 7 iha Munisípiu, nain 74 iha fasilidade governu iha Díli, no nain 10 iha fasilidade governu nian iha munisípiu sira. Pesoal ne’ebé liu ona loron 14 iha kuarentena obrigatóriu hahú hosi fulan Marsu to’o agora total hamutuk 2,311 hosi teritóriu tomak. Dms/flo
