MSSI Sei Submete Hikas Proposta Lei Protesaun Labarik Ba MRLAP

Fahe Tutan

Naunil Media (Díli), Vise-Ministra Solidaridade Sosiál no Inkluzaun (MSSI), Signi Chandrawati Verdial, hateten Governu liuhosi MSSI sei submete hikas Proposta Lei Protesaun Labarik ba Ministériu Reforma Lejizlativa no Asuntu Parlamentár (MRLAP) hodi halo fali diskusaun atu nune’e ba oin bele prosesa.

“Agora dau-daun ne’e ita-nia Lei Protesaun ba Labarik nian, ita diskute hela no hatama fali iha Ministériu Reforma Lejizlativa no Asuntu Parlamentár atu loke fali diskusaun kona ba lei refere, ami ho Parlamentu Nasional mós koalia ona, espera katak iha tempu badak ita sei bele dudu prosesu ne’e ba oin”,hateten Signi ba jornalista sira hafoin hala’o vizita ba labarik sira ne’ebé moras no baixa iha (HNGV), Segunda (01/06).

Vise-Ministra ne’e informa liu-tan, ba esbosu lei protesaun labarik kaduka tiha no uluk halo tiha ona konsultasaun maibé lei ne’e kaduka iha Parlamentu Nasional entaun sei halo fila-fali prosesu foun maibé parte tékniku sira halo hela diskusaun.

Governante ne’e tenik, “Halo fali diskusaun foun oinsá halo konsultasaun ba iha ita-nia sosiedade sivíl no komunidade sira, tenke hahú prosesu foun fila fali. Maibé ita mós hatene katak ita la’o hela ho osan duodésimu, ita labele hala’o atvidade oin-oin, haree took tinan oin mak Orsamentu Jerál Estadu (OJE) aprova foun, ita sei hala’o atividade sirane’e”.

“Agora sei iha situasaun Estadu emerjénsia ba moras Covid-19 tanba ne’e atividade hotu-hotu labele la’o maibé hein katak iha tempu badak sei normaliza no bele hala’o atividade hanesan baibain”. Dehan Nia. Ana

Leave a Reply

Your email address will not be published.