Governu Seidauk Deside Reativa Prosesu Aprendijazen
Naunil Media (Díli), Ministru Asuntu Parlamentar no Komunikasaun (MAPK), Francisco Jeronimo, deklara governu seidauk deside reativa eskola tanba sei halo kordenasaun ho Ministériu Saúde antes loke prosesu aprendisazen iha estadu emerjésia datoluk.
Ministru Asuntu Parlamentar no Komunikasaun, Francisco Jeronimo, informa asuntu ne’e hodi resposta deputadu balu ninia preokupasaun iha plenária Parlamentu Nasionál, Tersa (02/06).
“Relasaun ho edukasaun, ha’u hanoin pozisaun governu nian klaru, katak Governu seidauk loke eskola, se iha eskola balun agora hahú loke ne’e responsabilidade eskola ne’e nian tanba governu sei halo koordenasaun ho ministériu saúde ho ministeriu edukasaun no ensinu superiór atu haree kondisoens ruma para atu bele rezolve hodi loke eskola”, dehan MAPK, Frencisco Jeronimo.
Antes ne’e deputadu bankada Fretilin, Joaquin dos Santos mos preokupa ba atividade eskola ne’ebé mak atu la’o normal, bele fó infaktu ba moras COVID-19 atu hadaet, tanba nasaun viziñu Indonézia kazu COVID-19 kontnua aumenta nian númeru, tanba sei fó ameasa bo’ot ba Timor-Leste.
“Timór haketak ho fronteira rai maran, fasil tebes hadaet COVID-19 ba ita nia nasaun, tanba ne’e governu presiza halo perparasaun másimu ba eskola sira ne’e molok loke fali tanba referensia iha nasaun avansadu balun loke fali atividade eskola, maibé liu loron tolu de’it mosu fila fali moras COVID-19”. dehan Joaquin. Uar
