PD Apoiu Governu Hakotu Impase

Fahe Tutan

Naunil Media (Díli), Prezidente Partidu Demokráatiku (PD), Mariano Assanami Sabino, informa Partidu Demokrátiku (PD) fó nafatin apoiu ba governu konstitusionál da-ualu hodi hakotu impase polítika nune’e bele normaliza  situasaun ekonómia iha rai-laran.

Prezidente PD, Mariano Assanami Sabino, ba jornalita sira liuhosi  konferensia imprensa hafoin reuniaun extra-ordinária, iha sede partidu PD, Kolmera, Sesta (05/06).

“PD kaer nafatin prinsípiu hakarak fó kontribui ba governu hodi  hakotu impase polítika,  kontribui normaliza ekonómia iha rai-laran no aposta nafatin ba diálogu. PD kontribui viabiliza nafatin, hanesan postura PD nian ne’ebé mak hotu-hotu asiste katak bainhira ami oposizaun mos ami viabiliza governu ida liu-bá. Ohin ami mantein nafatin, governu ida agora tenke la’o ba oin hodi nune’e  hakotu impase polítika”, informa Assanami.

Líder Polítiku ne’e haktuir,  PD iha prinsípiu rasik hakarak aposta nafatin ba dialogu  entre líder sira, bolu malu rekuiñese ba malu hodi  lori timór  ba oin, tanba presiza líder sira hotu hamutuk.

“PD nafatin aposta ba dialogu, koalia ba malu kontribui tuir prinsípiu PD nian,  la’ós atu fahe kadeira ba malu, la’ós atu halo komprimisiu maibé rekuiñese malu katak rai ne’e ita hotu nian, ita hotu hamutuk la’o ba oin”, salienta Nia.

Eis Ministru Agrikultór no Peska ne’e realsa, “Ha’u hanoin viabiliza ne’e ema hotu-hotu kompriende, iha momentu ida ne’ebé mak fizikamente liu-ba, ami kuandu opozisaun mos ami fó a-favór ba programa ne’ebé governu aprezenta iha Paralamentu Nasionál. Ami prontu para ita la’o ba oin,  aposta nafatin ba diálogu para ema hotu pertense ba rai ida ne’e no  rekuiñese ba malu katak rai ne’e ita hotu nian,  ita hotu tenke fó liman ba malu, PD louva ba líder rejisténsia sira hanesan   maun Xanana Gusmão, maun Marí Alkatiri,  maun  Francisco Guterres Lu-Olo, maun Taur Matan Ruak no maun Lere Anan Timur no maun sira seluk, ita hotu hamutuk para rai ne’e ba oin, orgullu ba Timór-oan hotu”.

Ikus, Nia dehan, “Mekanizmu ba diálogu, Prezidente Republika (PR) Francisco Guterres ‘Lu Olo’  tenke bolu nafatin partidu polítika sira hodi ko’alia ba problema liu-liu asuntu nasionál, hanesan asuntu  determinasaun fronteira marítima, fronteira terestre no dezenvolvimentu nasionál”. Uar

Leave a Reply

Your email address will not be published.