TL Gasta Ona $12 Billoens Povu sei Moris Ki’ak
Naunil Media (Díli), Peskizadora NGO La’o Hamutuk, Eliziaria Febe Gomes, hateten maske ukun na’in Timor-Leste (TL) gasta ona osan fundu Petrolíferu ho montante $12 Billoens maibe liu pursentu 46 (%) povu sei moris iha pobreza laran.
“Maski Timor-Leste gasta ona osan $12 billoens husi fundu petrolíferu, maibe povu Timor-Leste iha pursentu 46 (%) mak kontinua moris iha pobreza multi-dimensional no laiha asesu ba servisu baziku sira hanesan saneamentu, bee moos, saúde no edukasaun ne’ebe adekuadu”, Peskizadora La’o Hamutuk Eliziaria Febe Gomes, ba jornalista sira liu husi konferensia imprensa iha FONGTIL, Kaikoli , Tersa (29/09).
Tuir Nia, Governu Timor-Leste seidauk uza riku soin mina no gas hodi hadi’ak no dezenvolve povu nia moris.
“Governu ho parseiru sira dezenvolvimentu nia relatóriu 2019 fó sai katak populasaun pursentu 36 (%) iha Timor-Leste nafatin moris iha kondisaun inseguransa ai-han kroniku no uma kain pursentu 15-37 (%) de’it mak iha kbiit asesu ba hahan lor-loron ho nutrisaun kompletu no 46 (%) labarik ki’ik sira ho idade menus tinan 5 moris ho krekas, badak no pursentu 40 (%) mak todan menus”, informa peskizadora ne’e.
Nune’e Peskizadora ne’e husu ba Governu atu realiza prinsipiu sira hotu tuir artigu 139 iha konstituisaun RDTL fundu petrolíferu, katak riku soin uniku ba benefisia povu. Emj1
