MS Distribui Ambulansia 16 ba Munisípiu 12 no RAEOA
Naunil Media (Díli), Tersa (25/08) ne’e iha Palásiu da Sinzas, Kaikoli, Ministra Saúde (MS), Odete Maria Freitas, ofisialmente distribui ambulansia 16 ba Munisipiu 12 inklui Rejiaun Administrativa Espesiál Oe-Cusse Ambeno (RAEOA) atu fasilita pasiente sira.
“Ambulansia ne’ebé iha sei oferese ba munisípiu hotu iha teritoriu Timor-Leste atu bele fasilita ba pasiente sira. Orsamentu ne’ebé hodi sosa ambulansia 16 ne’e ho montante hamutuk $80.000 orsamentu hirak ne’e mai husi COVID-19”, Ministra Saúde, Odete Maria Freitas, ba jornalista sira iha Salaun Palásio da Sinzas.
Nia hatutan ambulansia sira ne’e sei distribui hotu ba munisipiu, maibé munisipiu 3 mak sei hetan ambulansia rua, mak hanesan munisipiu Baucau, Ermera no Lautém.
“Munisipiu seluk sei hetan deit ambulansia ida, munisipiu 3 ne’ebé hetan ambulansia rua ne’e tanba haree ba iha númeru populasaun ninian ne’ebé barak”, tenik Ministra Saúde ne’e.
Nia husu ba motorista sira uza kareta ne’e ho didiak waihira halai ho nia velocidade ne’ebé aas ka neneik sira tenki hatene, nune’e bele kuidadu kareta ne’e ho di’ak. Emj2
