PM Taur Deside Fatin Arte Moris ba CCLN
Naunil Media (Díli), Sekretáriu Estadu Arte Kultura (SEAK), Teofilo Caldas, haktuir Primeiru Ministru (PM) Taur Matan Ruak deside ona fatin Arte Moris iha Komoro hodi entrega ba Konsellu Kombatentes Libertasaun Nasionál (CCLN-Sigla Português) tanba durante ne’e CCLN seidauk iha fatin hodi hala’o servisu.
“Ohin, Primeiru Ministru (PM) Taur Matan Ruak bolu Sekretaria Arte Kultura (SEAK) mai hodi orienta katak fatin Arte Moris ne’e ita deside no atribui ba ita-nia konsellu veteranus. Ami konkorda hanesan instituisaun ida ita hotu fasilita malu hodi hala’o servisu”, SEAK, Teofilo Caldas, ba jornalista sira hafoin sorumutuk regular ho PM Taur Matan Ruak, iha Palásiu Governu, Tersa (07/07).
Tuir Governante ne’e, governu hola nia papél, responsabilidade no tenke buka fatin ba CCLN.
“Ita-nia veteranus sira mós luta ba 24 anus ita hetan ukun-an, ohin loron sira forma konsellu veteranus depois sira fatin la iha tan, ita sente triste bo’ot. ami sei buka fatin seluk ba akademia arte kulturál nian”, tenik membru Governu konstitusionál da-ualu ne’e.
Governante ne’e esplika, fatin arte moris ne’e uluk ministéiru justisa liuhosi sekretariu estadu terras propriedades entrega ba ministéiru ensinu superiór arte kultura (MESK) ba sekretáriu estadu arte kultura (SEAK) hodi uza sai hanesan sentru kulturál ba akademia indústria, arte kreativu kulturál iha Timor-Leste.
Antes ne’e konsellu veteranus hasoru Primeiru Ministru no Prezidente Repúblika (PR) Francisco Guterres ‘Lú Olo’ hodi hato’o sira nian preokupasaun liuliu fatin ho nune’e PM Taur Matan Ruak kordena SEAK hodi entrega fatin Arte moris Komoro ba konsellu veteranu. Lop