MAP Sei Sosa Fini Husi ANAPROFIKO–TL Tonelada 396
Naunil Media (Díli), Tuir planu tinan 2020 ne’e, Ministériu Agrikultura no Peska (MAP) sei sosa fini husi Asosiasaun Nasional Produtór Fini Komersial-Timor-Leste (ANAPROFIKO-TL) hamutuk tonelada 396 hodi distribui ba povu agrikutór sira.
Asuntu ne’e informa husi Prezidente ANAPROFIKO-TL, Ilidio Mau-Terca Mendonça, ba Naunil Media hafoin sorumutuk ho ekipa MAP, iha Komoro, Kinta (16/07).
“ANAPROFIKO-TL sei kolabora ho parte aprovisionamentu no logistika MAP nian, jurídikamente no plataforma tuir tuir lei ne’ebé vigór. Nune’e iha tinan 2020 ne’e ita distribui fini ho rigoroju, la hanesan tinan kotuk. Tinan ida ne`e ho sistema regoroju tanba ho orsamentu emerjénsia, la’ós orsamentu normal, ita hotu akonpaña governu sei moris ho orsamentu doudesimal”, hateten Prezidente ANAPROFIKO-TL, Ilidio Mau-Terca Mendonça.
Dirijente ANAPROFIKO-TL, Ilidio Mau-Terca Mendonça, informa iha tinan ne’e sira prepara ona fini batar hamutuk tonelada 236 no haree ho tipu Nakroma hamutuk tonelada 160, dadaun ne’e sei teste laboratóriu iha MAP.
“Agora ita deskuti hela, depois sei akonpaña parte relevante sira iha MAP, hanesan Diretóra Jeral MAP, logistiku MAP, aprovisionamentu MAP no parte jurídiku, nune’e bele sequel (xave) fini ne’ebé Governu sosa hodi tau iha armázen asosiasaun ANAPROFIKO-TL nian”, tenik Prezidente ANAPROFIKO-TL, Ilidio.
Iha fatin hanesan Diretóra Jerál MAP, Maria Odete do Ceu Guterres, afirma distribuisaun fini tenke servisu tuir prosedimentu no finansas.
“Ha’u hanoin ita-nia kooperasun ho ANAPROFIKO-TL ne’e importante tebes, tanba faktu hatudu katak fini ne’e iha duni. Ita sei halo akizasaun ba fini no sei responsabilidade parte logistika MAP”, akresenta Diretóra Jerál MAP, Maria Odete do Ceu Guterres.
Prtisipa iha enkontru ne’e, kompostu husi Diretóra Jerál MAP, Maria Odete do Ceu Guterres, xefe departementu fini Fernando Soares no delegadu ANAPROFIKO-TL sira husi munisípiu-13. Iha tinan ne’e produtór ANAPROFIKO-TL sei distribui fini hamutuk tonelada 396. Leo/Pau
