PN Sei Autoriza PR Lú Olo Dekreta EE ba Da-IV
Naunil Media (Díli), Sekretária Meza Parlamentu Nasionál (PN), Deputada Lídia Norberta, informa Parlamentu Nasionál halo ona deliberasaun atu konvoka plenária estraordinária hodi fó autorizasaun ba Prezidente Repúblika (PR), Francisco Guterres ‘Lú Olo’ atu dekreta tan Estadu Emerjensia ba da-haat (IV).
“Halo dileberasaun atu konvoka plenáia estraordinária ida ne’ebé mak nia intensaun prinsipal ne’e atu fó autorizasaun ba Prezidente Repúblika atu dekreta Estadu Emerjénsia”, Sekretária Meza PN, Deputada Lídia Norberta, ba jornalista sira hafoin enkontru ho líder sira bankada, iha Sala Konferensia Uma Fukun, Kuarta (05/08).
Deputada ne’e hatutan, durante ne’e Timor-Leste seidauk iha vasina ba COVID-19 nian, tanba ne’e estadu iha dever hodi asegura moras ne’e labele daet ba populasaun.
“Infelizmente ita nia rain dadaun, ita iha segunda vaga propagasaun Surtu COVID-19, ne’ebé mak ita haree ema estranjeiru ida mai hetan pozitivu, entaun ita labele ses husi ne’e, tanba ita vasina mos laiha, satan aimoruk sira atu kura mos laiha, entaun Estadu nia dever iha konstituisaun Repúblika, estadu mak tenki ser asegura direitu ba moris populasaun nian”, esplika Deputada husi bankada Fretilin, Lídia.
Deputada ne’e haktuir, reuniaun lider sira bankada nian hala’o atu konfirma nafatin katak sira (Governu) presiza duni halo prosedimentu tuir konstituisaun no husu autorizasaun ba PN hodi fó kompetensia ba PR dekreta EE.
Posivelmente Plenaria estraordinária ne’e bazeia ba konsulta ne’ebé mak Prezidente Parlamentu Nasionál, Aniceto Guterres halo ho líder bankada sira hotu aseita, tanba ne’e maka plenaria estraordinária ne’e sei halo entre loron Kinta ou Sesta hafoin fó autorizasaun ba Prezidente Repúblika atu dekreta estadu emerjensia ba loron 30 tan.
Maske iha tempu resesu, deputadu sira feriadu hotu maibé iha komisaun permanente hodi hala’o funsaun parlamentu nian, deliberasaun ne’ebé mak fóin dadaun ne’e halo.
Total deputadu ne’ebé mak iha komisaun permanente hamutuk deputadu 31, sira ne’e kompostu husi Prezidente Parlamentu Nasionál, Vise Prezidente Parlamentu Nasionál nain rua, CNRT nain 10, Fretilin nain 10, PLP 3, PD 2, KHUNTO 1, PUDD 1 no UDT/FM 1. Uar
