PR Deklara Estadu Emerjénsia ba Da-IV Hahú 06 Agostu To’o 04 Setembru 2020

Fahe Tutan

Naunil Media (Díli), Kuarta (05/08) ne’e, liu husi komunikadu imprensa Palásiu Prezidensiál Nicolau Lobato, Bairu Pité, ofiaisalmente  Prezidente Repúblika (PR), Francisco Guterres ‘Lú Olo’ deklara Extende Estadu Emerjénsia ba da-haat (IV) hahu loron 06 fulan Agostu to’o remata loron 04 fulan Setembru tinan 2020.

Hafoin rona hanoin favorável husi membru sira husi Konsellu Superior Defeza no Seguransa no Konsellu Estadu, Prezidente Repúblika, Francisco Guterres Lú Olo, ohin, haruka mensajen ba Parlamentu Nasional hodi husu autorizasaun atu halo deklarasaun ba estadu emerjénsia.

Iha mensájen ne’ebé diriji ba Parlamentu Nasionál, Prezidente Repúblika informa katak iha períodu naruk ida nia laran, iha territóriu nasionál la rejista kazu COVID-19 maibé ida ne’e la signfika Timor-Leste livre ona husi risku ka perigu. Ita sei hasoru nafatin risku tanba númeru kazu moras aumenta iha Repúblika Indonézia, partikularmente iha provínsia ne’ebé Timor-Leste fahe nia fronteira internasionál terrestre, no mós iha ita-nia país viziñu, Austrália.

Horseik, Iha 4 agostu, Timor-Leste rejista kazu pozitivu foun ida husi sidadaun ida ne’ebé tama mai territóriu nasionál husi fronteira terrestre.

Situasaun interna ohinloron iha ita-nia rai-laran la ejize medidas restritivas ne’ebé forte hanesan períodu estadu emerjénsia datoluk liubá . Tanba ne’e estadu emerjénsia foun ida ne’e sei parsialmente suspende no limita direitu ba sirkulasaun internasionál, liberdade sirkulasaun no fixasaun residénsia iha territóriu nasionál no mós direitu ba rezisténsia.

Prezidente Repúblika husu atu tau atensaun espesiál ba pontus entrada ba territóriu nasionál atu ita bele hasees-an husi risku coronavírus tama tan iha ita-nia rain. Sidadaun sira ne’ebé tama iha Timor-Leste tenke submete ba kuarentena, katak sei moris ketak iha fatin ida durante loron sanulu resin haat.

Ba estadu emerjénsia ida ne’e atividade ekonómika, sosiál, kulturál, eskolár, serbisu, halimar, vizita família, toka no kanta sei la’o hanesan bainbain. Hothotu tenke haktuir prátika fase liman beibeik, uza máskara no distanciamentu sosiál atu ita ida-idak bele hasees-an husi moras Covid-19 no karik moras, la hada’et ba ema seuk.

Prezidente Repúblika hatete katak lisaun prinsipál ida ne’ebé aprende iha luta kontra koronavirus mak unidade. Unidade husi ema hotu-hotu, feto, mane, foin-sa’e ka lae, sidadaun nasional ka estranjeiru. Hotu-hotu iha responsabilidade atu kumpre ninia dever ba Povu Timor-Leste no ba umanidade tomak. Liuhusi kontribuisaun ema hotu nian mak Timor-Leste bele manán dezafiu ida ne’e.

Ohin lokraik Komisaun Permanente Parlamentu Nasional aprova pedidu autorizasaun husi Prezidente Repúblika. Liuhusi Dekretu Presidensial ho data 5 agostu 2020, Prezidente Repúblika deklara estadu emerjénsia ba loron-30, hahú husi tuku 00.00 iha 6 agostu 2020 (kinta feira) no remata iha tuku 23.59 iha 4 setembru 2020 (sesta feira).**//Dms

Leave a Reply

Your email address will not be published.