Selebra Ezistensia FALINTIL Tinan 45 : F-FDTL Apoiu Ai-han ba Kbi’it Laek Sira no Presta Omenajen ba Eroi Sira iha Manufahi
Naunil Media (Manufahi), Domingo (09/08) ne’e, Komandu FALINTIL-Forsa Defeza Timor-Leste (F-FDTL) ho nia membru ekipa Tour FALINTIL nain-450, sira hala’o vizita ba monumentu Don Boaventura no jardim erois iha Luak-Manufahi hodi presta omenajen.
Xefe Estadu Maiór Jenerál F-FDTL, Majór Jenerál Lere Anan Timur, deklara sira-nian vizita ne’e hodi presta omenajen ba saudozu Don Boaventura no eroi Manufahi ne’ebe mate ba rai Timor-Leste, hanoin hikas saudozu sira nian luta kontra okupasaun Governu Porgués no Indonezia hodi lori Timor hetan nia independensia.
“Vizita ne’e ami atu fó valor ba ita nian eroi, hanesan Don Boaventura ninia istória no eroi sira seluk ne’ebe uluk mate ba rai ida ne’e. 20 fulan Agostu ne’e la’os atu relembra de’it FALINTIL nia luta, maibe relembra mos aswain Timor oan hotu-hotu nia luta” hateten Xefe Estadu Maiór Jenerál F-FDTL, Majór Jenerál Lere Anan Timur.
Eis-gerilleiru rejistensia komandante rejiaun Um Ponta Leste, Lere Anan Timur, hatutan selebra tinan 45 ba ezistensia FALINTIL, ba tinan ne’e selbra ho eventu úniku la’o haleu munisípiu 12 hodi fó hanoin hikas ba membru sira atu hatudu nafatin sira nian patriotizmu defende Estadu no Povu tuir lei hodi lori nasaun ne’e moris hakmatek.
Durante vizita Manufahi, Xefe Estadu Maiór Jenerál F-FDTL, Majór Jenerál Lere Anan Timur, ho ekipa Tour FALINTIL apoiu ai-han ba povu kbi’it laek hamutuk uma kain-40 mak antes ne’e ekipa hamutuk ho autoridade identifika ona.
Veteranu tinan 24, Lere husu ba povu atu labele haree valor ai-han ne’ebe komandu F-FDTL oferese, maibe apoiu ne’e nu’udar jestu domin bo’ot atu tulun povu bele konsumu netik ai-han, tanba uluk funu durante tinan 24, povu mak oferese ai-han ba FALINTIL iha ai-laran to’o vila laran.
Iha fatin hanesan, Adminitradór Munisípiu Manufahi, Arantes Isaac Sarmento agradese ba vizita F-FDTL hodi fó aopiu ai-han ba kbi’it laek sira no presta omenajen ba eroi sira mak mate ba Timor-Leste.
Seremonia presta omenajén ne’e hato’o direitamente husi Xefe Estadu Maiór Jenerál F-FDTL, Majór Jenerál Lere Anan Timur, akompaña husi Administradór Munisípiu Manufahi, Arantes Isaac Sarmento nokomandante PNTL Manufahi hodi selebra aniversáriu FALINTIL ba dala-45 (20 Agostu – 20 Agostu 2020). Vit
