Lere : Povu Labele Haluha Loron Aniversáriu FALINTIL

Fahe Tutan

Naunil Media (Manufahi),  Xefe Estadu Maiór Jenerál Forsas Adrmadas Libertasaun Nacionál Timor-Leste Independensia (FALINTILI)-Forsa Defeza Timor-Leste (F-FDTL), Majór Jenerál Lere Anan Timur, husu ba povu iha teritóriu Timor laran tomak labele haluha loron 20 fulan Agostu tinan 2020, aniversáriu FALINTIL nian ba dala-45.       

Xefe Estadu Maiór Jenerál F-FDTL, Majór Jenerál Lere Anan Timur, ba jornalista sira hafoin atribui nesesidade baziku ba komunidade kbi’it laek sira iha suku Betanu, Munisípu Manufahi, Domingu (09/08).

Asaun karidade apoiu nesesidade bazika ba kbi’it laek sira, nu’udar aktividade ida mak F-FDTL halo hodi selebra loron historiku nasional FALINTL ba dala-45 mak monu iha loron 20 fulan Agostu ne’e.

“Loron 20 Agustu ne’e inportante ba ita nia hakarak independénsia, ha’u husu ba povu no joven sira, labele haluha loron ne’e, la bele hanoin mos katak ho pregu de’it mak ita ukun rasik-án, to’o iha pregu ne’e liu husi prosesu naruk.  FALINTIL la iha, pregu mos laiha no Fretilin la iha pregu mos la iha hotu”, afirma eis-gerileiru komandante rejiaun I Ponta Leste no Xefe Estadu Maiór Jenerál F-FDTL, Majór Jenerál Lere Anan Timur.

Eis-gerileiru komandante rejiaun I Ponta Leste, Lere Anan Timur, apela ba Timor oan hotu  atu fó importansia ba loron istóriku sira ne’e, liu-liu mos ba loron aniversáriu FALINTIL.

 “Ami uluk ai-laran mos komemora loron 20 Agustu  no loron inportante sira seluk. Ita dala ruma ita servisu barak haluha loron sira ne’e”, tenik Xefe Estadu Maiór Jenerál F-FDTL, Majór Jenerál Lere Anan Timur.

Ikus-liu, Veteranu tinan 24, Lere Anan Timur , Tour FALINTIL hanesan eventu ida atu lori povu relenbra loron istótriku.

Tour F-FDTL partisipa husi membru nain-450 ho motor no kareta haleu munisípiu 12 hodi halo reflesaun ba istória luta FALINTIL nian hamutuk ho povu durante tinan 24 nia-laran.

Tour ne’e ho tema “Ho Espiritu FALINTIL, Prontu no Desididu Atu Serví Interese Povu no Nasaun” hodi selebra aniversáriu FALINTIL ba dala-45 mak sei monu iha 20 fulan Agostu tinan 2020 ne’e.

Rute Tour ne’e, hahu husi Díli ba Munisípiu Bobonaro reprezenta FALINTIL Rejiaun IV, Manufahi reprezenta Rejiaun III, Cararas Viqueque no Baucau reprezenta Rejiaun II, Iliomar Lautém no Tutuala reprezenta Rejiaun I Ponta Leste. Vit

Leave a Reply

Your email address will not be published.