MAP Koileta Fore Munggu Ektare Ida iha Betanu

Fahe Tutan

Naunil Media (Manufahi), Sesta (14/08) ne’e, Governu liu husi Ministériu Agrikultura no Peskas (MAP) koileta Fore Munggu hamutuk ektar ida husi Grupu Agrikultór Manufahi (GAM), iha aldeia Loro, suku Betanu, Postu Adiministrativu Same, Munisípiu Manufahi.

Liu husi deskursu, Vise-Ministeriu Agrikultura no Peskas-MAP, Abílio Savier de Araújo, apresia ho parseiru Internasionál sira mak durante ne’e fó ona apoiu ba Grupu Agrikultura Manunfahi hodi produz ai-han (Fore Munggu).

“Ha’u apresia tebes ho ita-nia parseiru Internasionál husi Australia makk durante ne’e   fó ona apoiu kreativu ba Assosiasaun Nasional Produtu Fini Komersiál Timor-Leste (ANAPROFIKO-TL), maske lala’o  neneik maibe bei-beik, sira realiza duni.  Ohin  loron fó duni rejultadu ne’ebé di’ak ba ita-nia agrikultór sira”, hateten Vise-MAP, Abílio.

Tuir Governante ne’e, Timor-Leste  labele dependénsia de’it ba mina, tanba mina loron ida sei maran, maibé  produsaun ai-han sei la hotu  no la lakon.

“Ita-nia agrikultór sira bele fó benefisiu di’ak, no hatudu rezultadu ne’ebé di’ak ba ita-nia agrikultór sira hotu”, tenik Vise-MAP, Abílio.

Iha fatin hanesan reprezentante embaixada Australia iha Timor-Leste, Benita Sommerville, hateten Governu Australia nafatin iha komitmentu hodi servisu hamutuk ho Governu Timor-Leste hodi apoiu ba dezenvolvementu   seitór agrikultura no bele hametin relasaun entre nasaun rua liu hosi seitór agrikultura.

“Obrigadu ba grupu agrikultór tanba ho kontribuisaun tomak no esforsu, ohin loron hatudu rezultadu ne’ebé di’ak.  Alein de  ne’e  mós  Australia servisu hamutuk ho agrikultór sira hanesan, Aileu, Viqueque, Kovalima, Bobonaru no Ermera. Ho ita-bo’ot sira-nia servisu hatudu duni valor   bele hamenus impaktu hosi moras COVID-19 no bele hamenus mós impaktu seluk siguransa ai-han nian”. Realsa Benita.

Iha okaziaun ne’e  Prezidente ANAPROFIKO-TL, Ilidio Mau-Tercha Mendonca, informa harii grupu hodi fó moris ba to’os nain sira no ba moris diak.

“Fini ne’e rasik hetan suporta husi grupu  Tomak no GAM, durante ne’e hetan mós apoiu maka’as husi sira. Produsaun  fore mungu ita bolu ho naran ‘kiukai’ ne’ebé mak daudaun ami koileta ne’e, To’os Ba Moris Diak  (TOMAK) mak sei hola fali fore mungu ne’ebé mak ami koileta ona”. Dehan Prezidente ANAPROFIKO-TL, Ilidio. Niko

Leave a Reply

Your email address will not be published.