FEATUREDIkus LiuNewsPolitika

Komisaun Rekuperasaun Ekonómika Entrega Planu ba PM Taur

Fahe Tutan

Naunil Media (Díli), Tersa (18/08) ne’e, Komisaun ba Elaborasaun ba Planu Rekuperasaun Ekonómika entrega ona planu rekuperasaun ekonómika ba Primeiru Ministru (PM), Taur Matan Ruak.

“Ami mai atu halo seremonia termu mandate ba komisaun tanba mandar remata ona. Ofisialmente ami entrega ona planu rekuperasaun ba Governu” informa Prezidente Komisaun ba Elaborasaun ba Planu Rekuperasaun Ekonómika, Rui Augusto Gomes, ba jornalista sira hafoin hasoru malu ho xefe orgaun ezekutivu Taur Matan Ruak, iha Palásiu Governu.

Prezidente Komisaun ba Elaborasaun ba Planu Rekuperasaun Ekonómika, Rui Augusto Gomes, informa liu-tan Unidade Planeamentu, Monitorizasaun no Avaliasaun halo dadaun ajustamentu kona-ba medida sira, oinsa mak indikadór sira ne’e bele transforma ba aktividade no mos oramentasaun, hahu iha Orsamentu Jerál Estadu (OJE) 2021 ba oin.

Rui Augusto Gomes, dehan planu ne’e foku atu fó valor liu ba ema nian bein estar saúde no edukasaun.

“Importante atu tau preoridade maka’as liu ba seitór sira ne’ebe ajuda ema atu iha oportunidade barak liu atu sir abele hala’o moris ho dignu”, tenik Eis-Ministru Planeamentu no Finansas, Rui Augusto Gomes.

Rui Augusto Gomes, hateten parte komisaun asegura ona liu husi medida atu bele garante ema nian rendimentu, empreza labele taka, maibe ativu nafatin iha merkadu atu bele fó empregu barak ba joven.

“Só ho rendimentu empregu mak ita bele dehan kresimentu ekonómiku bele akontese. Ita espera rekuperasaun ida ne’e hanesan format ida, katak ita monu maibe sa’e fila-fali” akreseta, Rui Augusto Gomes.

Tuir Eis-Governante ne’e, atu atinji medida hirak ne’e depende ba ezekusaun ne’ebe komisaun propoin on aba Governu konstitusionál da-ualu.

“Empreza sira barak mak redúz volume aktividade, entaun fó implikasaun ba traballadór balun ne’ebe presiza deskansa. Ami tenta atu sira labele lakon servisu, fila-fali mantein nafatin no oinsa empreza sira hahu aktividade, e ida ne’e mak medida sira agora dadaun implementa”, esplika, Rui Augusto Gomes.

Ikus-liu, Rui Augusto Gomes, dehan komisaun halo ona aprezentasaun rekomendasaun balun iha jornada orsamental foin lalais atu Governu bele konsidera iha proposta no tau hanesan programa preoridade ba rekuperasaun ekonómika.

Xefe Governu fó pose ba membru komisaun ne’e iha loron 18 fulan Juñu tinan 2020 ho mandate fulan rua, no membru sira kompostu husi Prezidente Komisaun ba Elaborasaun ba Planu Rekuperasaun Ekonómika, Rui Augusto Gomes ho ninia vogal nain haat, Rui Maria de Araújo, Manuel Wong, Carlos da Silva Lopes Saky no Berta Montalvão. Lop

Leave a Reply

Your email address will not be published. Required fields are marked *