FEATUREDIkus LiuNewsSeguransa

Lere : Tenki Halo Lei Garante Futuru Veteranu Sira

Fahe Tutan

Naunil Media (Dili), Xefe Estadu  Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu ba Estadu no GOvernu Timor-Leste atu rekuiñese no valorize funu na’in Forças Armadas da Libertação Timorense (FALINTIL), veteran no feto faluk oan ki’ak sira hanesan mos pensaun ba eis-titular sira.

“Hau rekomenda ba ita nian Estadu, primeiru tenki halo lei atu garante futuru veteran sira nian. Porezemplu sé deputadu ida iha ninia pensaun vitalísia ba ninia jerasaun ba jerasaun, e ami veteran mos tenki asesu ba direitu ida ne’e”, Xefe Estadu  Maior F-FDTL, Majór Jenerál Lere Anan Timur, ba jornalista sira hafoin partisipa semináriu nasionál FALINTIL iha Kuartel Jenerál Fatuhada, Tersa (18/08).

Tuir Eis-gerileiru rejistensia Komandante Rejiaun Um Ponta Leste, Lere, Estadu kria injustisa bo’ot, tanba deputadu ida tinan lima ka tinan tolu de’it diak liu fali luta na’in sira, veteranu luta durante tinan 24 kontra okupasaun Indonézia maibe laiha direitu pensaun hanesan eis-titular.

Xefe Estadu  Maior F-FDTL, Majór Jenerál Lere Anan Timur, sente triste wainhira nia ba halo vizita tuir munisípiu sira, haree veteran barak mak moris sei susar, maske ukun-an tinan barak ona.

“Tinan ne’e ita halo aniversáriu ba dala-45 ezistensia FALINTIL nian, FALINTIL hahu ho 20 i tall elementu, mas funu hotu veteran kuaze 100 mak tama mai no eziste dada bandeira Independensia ho ninia povu. Hau hanoin lakon bo’ot ita nian ema barak iha ita nian luta funu libertasaun Nasionál. FALINTIL la’os mate de’it maibe balun ema kaer no tortura no balun rende” tenik veteran 24 anos ne’e.

Nia rekomenda ba Governu konstitusionál  da-ualu liu husi Ministru Asuntu Veteranu no Sekretáriu estadu Veteranu Libertasaun Nasionál no Konsellu Nasionál Veteranu atu rejista preokupasaun sira ne’e hodi resolve problema veteran no faluk oan ki’ak sira.

“Agora tenki buka resolve problema sira para fó solusaun, fó importansia ba veteran, hanesan foin lalais ami halo Tour FALINTIL haleu, ami rona lamentasaun barak, mas hau dehan ita nian konsellu veteran iha tinan ne’e sei rezolve”, afirma Lere Anan Timur.

Ikus-liu, Tuir Veteranu 24 anos ne’e, atu resolve problema veteran no faluk oan ki’ak sira nian, Governu liu-liu líder nasionál sira tenki hamutuk hodi hakotu impase polítika iha rai-laran. Flo/Leo

Leave a Reply

Your email address will not be published. Required fields are marked *