PM Taur enkontru bilateral ho PR Indonézia, Joko Widodo
Naunil Media (Labuan-Bajo, Indonézia, Indonézia), Loron 09 fulan-maiu, tinan 2023 – Primeiru-Ministru (PM) Taur Matan Ruak, hafoin to’o iha Labuan-Bajo NTT, Indonézia, hala’o kedas enkontru bilateral Prezidente Repúblika (PR) Indonézia, Joko widodo iha Otel Meruorah, Labuan-Bajo, Indonézia, iha ámbitu Simeira ASEAN ba dala-42, hodi aprofunda liutan relasaun no kooperasaun entre Timor-Leste no Indonézia iha Rejiaun ASEAN.
Iha Reuniaun ne’e, Prezidente Jokowi hanesan uma na’in Prezidensia ASEAN nian, fó bem-vindu ba Primeiru-Ministru Taur Matan Ruak iha Labuan-Bajo, iha ámbitu atende Simeira ASEAN ba dauluk nu’udar membru País ASEAN ba dala-11 ho estatutu observadór.
Prezidente Jokowi hatutan Indonézia hanesan Prezidénsia ASEAN, iha komitmentu boot tebes atu apoiu Timor-Leste nia roteiro liuliu iha kapsitasaun institusional hodi prepara rekursu umanus Timor-Leste nian molok to’o membru pleno.
Iha reuniaun ne’e, Indonézia iha komitmentu boot hakarak aprofunda liutan kooperasaun bilateral, liuliu dezenvolvimentu integradu iha Zona Fronteira ho Timor Osidental. Indonézia mós preparadu ba esbosu akordu bilateral investimentu nian, hodi dudu ekonomia Timor-Leste ba oin hanesan País membru ASEAN.
Entertantu Xefe Governu Timor-Leste, agradese tebes ba konvite espesial hosi Prezidente Jokowi hodi partisipa iha Simiera ASEAN nian.
Aproveita biban refere, Xefe Governu Timor-Leste reteira fila-fali Timor-Leste nia agardesimentu wa’in ba apoiu inkondisional Indonézia nian dezde 2021 kona-ba adezaun Timor-Leste nian ba ASEAN, no apoiu ba kapasitasaun institusional. Iha enkontru refere, Xefe Governu hetan akompañamentu hosi Ministra Negósius Estranjeirus no Kooperasaun, Adalzija Magno. */Tri
