Ekipa IDÚ Sosializa Sistema Identidade Úniku ba Estudante 800-resin ho Manorin Sira iha CSIL
Naunil Media (Likisá), Sesta 012 fulan Maiu ne’e, ekipa Diresaun Identidade Úniku (IDÚ)-TIC Timor, I.P, sosializa sistema Identidade Úniku ba estudante atusualu-resin ho manorin sira husi Ensinu Sekundária no Presekundária iha Colegio de Santo Inácio de Loiola (CSIL), Kasait.
Atividade sosializasaun ne’e, ho objetivu atu informa no disemina kona-ba sistema idantidade úniku ba estudante no manorin sira hodi bele hatutan ba família no ema ne’ebé besik hafoin implementa sistema refere.
Koordenadór Komunikasaun Interinu, Sr. Diogo de Jesus Carvalho, agradese ba profesór sira iha CSIL ne’ebé prepara ona fatin no tempu hodi organiza estudante sira atu partisipa sosializasaun ne’e hodi hatene kona-ba prosesu no implementasaun sistema refere iha Timor-Leste.
Nia mós apresia no agradese ba estudante sira ne’ebé akompaña didi’ak no husu pergunta sira ne’ebé mosu diferente husi sosializasaun ne’ebé halo ba munisípiu no eskola sira iha territóriu Timor-Leste tomak.
Iha sosializasaun ne’e manorin sira no estudante entusiazmu hodi akompaña kona-ba aprezentasaun sistema Identidade Úniku ne’ebé sei aplika iha Timor-Leste.
Diretór Colegio de Santo Inácio de Loiola, Pe. Isaías Abilio Caldas, SJ hatete, nia parte agradese TIC TIMOR, I.P liuliu Diresaun Identidade Úniku ne’ebé bele fahe informasaun kona-ba sistema Identidade ba estudante no Manorin Sira iha CSIL refere.
“Ami-nia Esperansa, ho sosializasaun ne’e estudante Sira bele informadu di’ak konaba sistema ne’ebé Sei implementa Iha-ne’e”, dehan Pe. Isaías, bainhira fó liafuan benvindu ba ekipa ID Úniku iha salaun Ginajiu CSIL, Kasait, sesta (12/05/2023).
Sosializasaun ne’e hetan partisipansaun husi manorin sira iha CSIL, estudante 800-resin, ekipa Identidade Úniku ne’ebé lidera husi Sr. Diogo de Jesus Carvalho (Koordenadór Komunikasaun Interinu), Sra. Felizmina Zela Costa Akoyt no Sr. Antonio Soares Lemos (Ofisiál Rejistrasaun). */Tri
