Xefe Suku Bucoli, Terezinha Reis : Tenki Rekorda Heroi Sira Mate ba TL
Naunil Media (Baucau), Xefe Suku Bucoli, Postu Administrativu Baucau, Munisípiu Baucau, Terezinha dos Reis, hateten selebrasaun loron FALINTIL (20 fulan Agostu) atu relembra maun alin sira mate hodi sosa liberdade.
“Ohin loron 20 Agostu, ita hotu hatene hanesan loron ne’ebé importante ba ita nia FALINTIL liman kroat povu nian no ita tenki selebra bebeik ba ita nia heroi sira ne’ebé mate ba rai ida ne’e” Xefe suku Terezinha dos Reis, ba jornalista sira hafoin isar bandeira RDTL ho bandeira FALINTIL iha Sede suku Bucoli, Kinta (20/08).
Xefe suku ne’e husu ba joven sira hotu tenki kontinua relembra historia ne’ebé uluk heroi sira halo ba rai Timor-Leste.
Iha Fatin hanesan Veteranus Bucoli, Silveiro da Silva, sente orgullu ho aniversáriu FALINTIL ba dala 45 no husu Veteranu sira atu nafatin hamutuk hodi dezenvolve Timor-Leste ne’ebe di’ak ba jerasaun foun sira.
Observasaun jornalista Naunil Media, korpu isar bandeira iha komemorasaun aniversáriu FALINTIL ne’e mai husi estudante EBF Bucoli, mak Emanuel da Silva, Ronaldo Lopez no Tito Janu Marçal.
Ekipa isar bandeira RDTL mak Cezar da Silva, Gaspar da Silva, Inacio Jorge da Costa, enkuantu serimonia aniversariu ne’e partisipa husi administradór postu Baucau, ekipa PNTL eskuadra Baucau, F-FDTL Baucau no entidades relevantes inklui mós estudante no komunidade sira. Ivo
