Komisáriu Faustino : PNTL Kontinua Servisu ba Povu Moris Seguru no Paz

Fahe Tutan

Naunil Media (Díli), Komandante Jerál Polísia Nasionál Timor-Leste (PNTL), Komisáriu Faustino da Costa, deklara PNTL sei kontinua servisu maka’as ba prevensaun konflitu, nune’e povu bele moris ho seguru no paz nia laran.

Komandante Jerál PNTL, Komisáriu Faustino da Costa, deklara asuntu ne’e ba jornalista sira, hafoin sorumutuk seminal ho Prezidente Repúblika (PR), Francisco Guterres ‘Lú Olo’, iha Palásiu Prezidensiál Nicolau Lobato, Bairu Pité, Kinta (27/08).

“PNTL kontinua hala’o servisu maka’as hodi fó seguransa ba povu no rai ida ne’e, hodi prevene konflitu iha ita nia rai laran, nune’e povu bele moris ho seguru no paz nia laran”, hateten KomJer PNTL, Komisáriu Faustino da Costa.

Komisáriu Faustino, haktuir sorumutuk semnal ne’e nia inform aba Xefe Estadu Timor-Leste Lú Olo kona-ba situasaun seguransa iha teritóriu nasionál no fronteira.

“Sorumutuk ohin, hau aprezenta situasaun husi nível teritóriu nasionál liu-liu asuntu fronteira, ida ne’e mak hau aprezenta ba Sua Exelensia Prezidente Repúblika, katak situasaun iha ita nia rai-laran la’o di’ak hela”, dehan Komisáriu PNTL, Faustino da Costa.

Kona-ba seguransa iha fronteira tasi Timor nian, Komandante Jerál PNTL, hateten kontinua refórsa membru Polísia Unidade Marítima atu prevene aktividade ilegais.

Faustino dehan, PNTL laiha ekipamentu prevensaun COVID-19, maibe la defikulta servisu seguransa ba rai no povu Timo-Leste.  

“Ekipamentus protesaun ba membru PNTL sira mós limitadu duni maibé ida ne’e la signifika membru sira la halo servisu, maibé sira kontinua hala’o nafatin servisu, komandu mós haree oinsa bele fornese maskara no buat balu hanesan Farda, Sapatu no inklui hahan ba sira hodi hala’o servisu iha fronteira”, hakotu Nia. Flo

Leave a Reply

Your email address will not be published.