IRI Fasilita Diskusaun Entre Membru PN, Sosiedade Sivíl no Seitór Privadu

Fahe Tutan

Naunil Media (Díli), Kinta (27/08) ne’e, International Republican Institute Timor-Leste (IRI-TL) liu husi programa USAID TL nia Projetu Konsórsiu ba Eleisaun no Haforsa Prosesu Polítika organiza diskusaun meza redonda ho membru Parlamentu Nasionál (PN), sosiedade sivíl sira no seitór privadu mak hala’o servisu advokasia ba seitór agrikultura.

Diskusaun meza redonda ne’e hala’o iha Salaun Cruz Vermelha Formoza, ho tema “Hasa’e Produsaun Hortikultura, Fila Liman Ne’ebé Hala’o Ho Sosiedade Sivíl No Seitór Privadu”.

Jestor Programa IRI-TL, Karlito Nunes, informa papél IRI atu kria espasu ida ne’e hodi sosiedade sivíl no seitór privadu sira bele hato’o sira nia preokupasaun no dezafiu ne’ebé durante ne’e hetan iha terenu hodi hato’o ba komisaun D bele uza infórmasaun no sujestaun sira kona-bá programa politika guvernu nian.

“Ha’u hanoin programa ida ne’e bele kria pasu ida entre sosiedade sivíl ho seitór privadu koalia ho parlamentu liu-liu ba komisaun D trata asuntu Agrikultura no Ekonomia Dezenvolvimentu atu halo polítika di’ak ba dezenvolvimentu povu nian”, Jestor Programa IRI-TL, Karlito Nunes, ba jornalista hafoin fasilita diskusaun iha Salaun Cruz Vermelha, Fórmoza.

Jestór Programa IRI-TL, Karlito Nunes, hateten atividade meza redonda ne’e hala’o dala hitu (7) ona entre sosiedade sivíl ho membru sira parlamentu liu-liu komisaun espesializada.

Iha fatin hanesan Diretór AGI Agrikultura, Nilton Aniceto, hateten tinan barak ona Timor-Leste inporta produtu husi nasaun seluk, no la tau inportansia hodi kria polítika hafórsa produsaun rai-laran kompara Vietnam.

“Tuir lolos ita mós bele apriende husi Vietnam, bele sosa iha parte balu maibé iha tempu hanesan ita mós tenki haforsa no hadi’ak fali produsaun rai-laran nian, nune’e bele halo kampaña ida oinsa hadomi produtu no konsumu produtu rai-laran,  nune’e osan ne’ebé iha labele sai ba rai liur”, teknik Diretór AGI Agrikultura, Nilton Aniceto.

Deputadu Komisaun D trata asuntu Agrikultura no Ekonomia Dezenvolvimentu, Antonino Bianco, hateten nu’udar reprezentante povu iha uma fukun Parlamentu sei hato’o ba Governu atu fó atensaun ba meloramentu Estrada rural atu fasilita  agrikultór sira ba fa’an iha merkadu. Emj3

Leave a Reply

Your email address will not be published.