TL ho Japaun Asina MoU ba Projetu JDS

Naunil Media (Díli), Ministra Negósius Estranjeirus no Kooperasaun, Adaljiza Magno, asina Memorandum of  Understanding (MoU) ho Governu Japaun ba projetu bolus estudu dezenvolvimentu rekursu humanu (Japan Development Scholarship-JDS) ba datoluk iha Timor-Leste (TL).  

Asina nota de intedementu ne’e selebra iha Salaun Ministériu Negósius Estranjeirus no Kooperasaun (MNEK), Kinta (27/08).

Ministra Negósius Estranjeirus no Kooperasaun, Adaljiza Magno, hateten projetu ne’e finansia tomak husi Governu Japaun liu husi nia embaixa iha Timor-Leste.

“Ita hatene katak programa ida ne’e apoiu ona estudante barak no ohin asina tan, ida ne’e sei fó oportunidade espesífiku ba funsiunáriu sira” Ministra Negósius Estranjeirus no Kooperasaun, Adaljiza Magno, ba jornalista sira hafoin selebra asina akordu iha Salaun MNEK.

Kona-ba apoiu ne’e, Ministra Adaljiza Magno, dehan bele aumenta funsiunáriu públiku sira liu husi estudu formulasaun no implementasaun ba planu dezenvolvimentu social no ekonómia, nune’e bele sai mos líder iha future.

Iha fatin hanesan, Embaixadór Japaun mai Timor-Leste, Kinefuchi Masami, hateten Governu Japaun fó ona konvite bolus estudu hamutuk nain-2.000 atu hala’o estudu iha Japaun tuir nia tempu ne’ebe diferente.

“Akordu ne’e atu konvida funsiunáriu públiku foinsa’e sira atu hakat ba iha Japaun atu hetan kuiñesementu no abilidade espesializadu ba polítika planeamentu hodi bele implementa iha Timor-Leste wkuandu fila mai”, tenik Diplomata Japaun iha TL, Kinefuchi Masami.

Embaixadór Japaun mai Timor-Leste, Kinefuchi Masami, hateten programa Japan Development Scholarship-JDS hahu ona iha tinan rua liu-ba kotuk no ida ne’e hanesan kontinuasaun ba etapa datoluk.

“Programa ne’e sei sai oportunidade ba líder joven sira no bele halo ligasaun ho líder joven sira Aziatika mak estuda iha Japaun”, dehan Embaixadór ne’e.

Diplomata ne’e hein katak ho programa Japan Development Scholarship-JDS ne’e bele aumenta tan kontribuisaun susesu ba kontrusaun Timor-Leste no promosaun relasaun amigo entre nasaun ka estadu rua.

“Hau dezeiju atu servisu hamutuk ho Ministra Adaljiza Magno, it abele iha serimonia nota de intedementu barak liu-tan atu implementa projetu di’ak sira ne’ebe bele ajuda Timor-Leste atinji ninia objetivu sira dezenvolvimentu ninian”. Dehan embaixadór Japaun ne’e. Ana