Arantes : Joventude Tenki Respeita Líder Istóriku Sira
Naunil Media (Manufahi), Administradór Munisípiu Manufahi, Arantes Isac Sarmento, apela ba joventude labele uza média sosiál hodi ataka líder istóriku, maibe nu’udar joven tenki sai kualidade produtivu hodi servi rai Timor-Leste (TL).
“Hau husu ba joven sira tenki respeita líder sira, labele uza média sosial hodi trata at no ataka líder sira, tenki respeita veteran sira, professór/a no inan-aman sira, nu’udar joven tenke hatudu ezemplu di’ak ba ki’ik sira ne’ebé tuir mai”, Administradór Munisípiu Manufahi, Arantes Isac Sarmento, apela asuntu ne’e liu husi nia deskursu iha Luak Same, Manufahi, Domingu (30/08).
Administradór Munisípiu Manufahi, Arantes Isac Sarmento, enkoraja joven tenki prepara an hodi kontribui dezenvolvementu Timor-Leste.
“Husu ba joven sira tenki hatudu komprimentu ne’ebé diak hahu husi uma laran ba to’o iha sosiedade, tenki hanoin eskola hodi sai joven ne’ebé iha kualidade produtivu no konstrutivu hodi kontribui ba rai ida ne’e, tanba imi mak futuru nasaun nian”, tenik autoridade Munisípiu Manufahi ne’e.
Tuir Administradór Munisípiu Manufahi, uza media sosial hodi insulta, ataka lider sira, ne’e laos kultura Timor nian.
Iha fatin hanesan Prezidente Kram Minisípiu Manufahi, Adriano Corte-Real, husu joven sira sai mata dalan ba dezemvolvementu, tanba tanba ne’e tenki dezenvolve an liu husi dalan edukasaun.
“Joven sira tenki hatudu atetude ne’ebé di’ak tanba nasaun ne’e presija ema kualidade nune’e bele hadi’ak no serví, kuidadu án hodi proteze imi nia futuru tanba liu hosi dalan edukasaun, no presiza esforsu an, sai joven labele baruk tanba nasaun ne’e iha imi foinsa’e sira nia liman”, dehan Prezidente KRAM Munisípiu Manufahi ne’e. Nico
