LGBT-TL Selebra Konsulta Popular ba Dala-XXI ho Aktividade Desportu

Fahe Tutan

Naunil Media (Díli), Lesbian Gay Bisexual and Transgender Timor-Leste (LGBT-TL) selebra Loron Konsulta Popular (30 Agostu 1999 – 30 Agostu 2020) ho aktividade desportu futeból hodi hametin lasus amizade entre sira no anima ema sira komunidade.     

Jogu amizade ne’e hala’o iha Aldeia Markoni, Suku Fatuhada, Postu Administrativu Dom Aleixo, Munisípiu Díli, Domingo (30/08), entre ekipa futeból Borboleta kontra ekipa Casa De Ros ho rezultadu 2 versu 0.

Jogu remata, Reprezentante ekipa futeból Borboleta, Adipati, espresa sentiment kontente tanba bele partisipa iha aktividade desportu ne’e hodi anima komunidade.  

“Orgullu tebes ba komisaun Markoni nian, bele fó oprtunidade mai ami transgender hodi partisipa iha jogu amizade hodi selebra loron 30 de Agostu”, informa Adipati.

Iha sorin seluk, Reprezentante ekipa Casa De Ros, Angel, orgullu mos tanba bele partisipa, maibe senti trizte tanba la marak golu ruma ba rede adversáriu.

“Kontente tebes, tanba hatudu katak ami komunidade Lesbian Gay Bisexual and Transgender ne’e eziste duni iha ita nia rain Timor-Leste, maske triste tanba ohin ami lakon maibe ida ne’e mak rezultadu jogu”, tenik nia.

Komisaun Organizadór ba eventu refere (30 de Agusto ), Diametro Da Conseicao Do santos, hateten aktividade desportu refere hala’o hodi selebra Loron Konsulta Popular 30 de Agostu tinan 2020 ne’e, no kria lasu amizade Entre transgender sira, sai mos hanesan animasaun ida ba komunidade atu labele halo diskriminasaun malu.

“Jogu ne’ebe mak ohin akontese iha Aldeia 04 Markoni entre Transgender sira ne’e espesial tebes, ne’e foin primeira vez realiza, ida ne’e mak Ami orgullu tanba hetan partisipasaun máximu hosi Komuniadade sira”, hateten Komisaun Organizadora.

Ikus-liu, Nia dehan, aktividade ne’e lahetan apoiu fundus ruma husi Governu, maibe inisitaiva no apoiu hosi komunidade, inklui kompania balun. Dms

Leave a Reply

Your email address will not be published.