PR Horta Mak Prezide Serimonia Loron Bo’ot 12 Novembru
Naunil Media (Díli), Komisaun Organizadora (KO), ba Komemorasaun Masakre Santa Cruz no mós loron Nasionál Juventude husu Xefe Estadu atu prezide serimonia 12 Novembru tinan ne’e iha Santa Cruz.
Kestaun ne’e hato’o husi Sekretariu Estadu Juventude no Desportu (SEJD) Abrão Saldanha ba Jornalista sira hafoin remata enkontru ho Prezidente Repúblika (PR) José Ramos Horta iha palásiu Prezidensiál Nicolau Lobato Bairru Pite, Segunda, (07/11).
“Ohin ne’e lori Komisaun Organizadora ba komemorasaun masakre Santa Cruz nian no loron nasionál Juventude inklui mós deslutu saudozu Maxthal mai informa ba Prezidente Repúblika aumezmu tempu Konvida Prezidente Repúblika kona-ba selebrasaun loron nasionál Juventude no komemorasaun masakre Santa Cruz nian. Ida ne’e mak ami ohin mai iha ne’e atu Konvida no fó konvite formál ba Prezidente Repúblika no husu Prezidente Repúblika nia disponibilidade atu prezide serimonia 12 Novembru nian iha Santa Cruz,” dehan SEJD
Sekretariu Estadu ne’e hatutan kona-ba loron nasionál Juventude iha Timor laran selebra iha postu administrativu Timor laran tomak iha nivel nasionál iha aktividade lubuk ida hahu kedas 27 Outubru loron 28 Outubru loron saudozu Maxthal ho saudozu Sebastião Gomes nia loron depois mai to’o iha 12 Novembru.
“Aktividade sosiu kulturál desportivu ne’ebé mak halo atu komemora ida ne’e inklui semináriu, kompetisaun pintura, diskursu públiku, aktividade desportu hanesan motor ciklizmu programa sira ne’e mak ita aprezenta ba Prezidente Repúblika no informa mós tema ba selebrasaun tinan ne’e nian mak ‘kaer metin ba valor sira Juventude rezisténsia nian hamutuk ita kontinua konstrui nasaun ho esperansa ba futuru”, tenik Sekretáriu Estadu.
Nia dehan orsamentu ba selebrasaun nasionál iha 40.000 ital ne’e eventu rua hamutuk, eventu deslutu saudozu Maxthal nian no selebrasaun masakre Santa Cruz nian no loron nasionál Juventude.
“Munisípiu sira ita halo selebrasaun to’o postu ida-idak iha selebrasaun ida ne’e ita iha orsamentu balun kuaze 60.000 ne’ebé distribui ba postu administrativu ida-idak iha Timor laran tomak sira selebra de’it iha ne’ebá ita nasionál selebra iha Díli,” katak nia
Iha enkontru ne’e Prezidente Repúblika (PR), José Ramos Horta mós disponivel partisipa eventu ne’e no prontu atu hato’o mensajen ruma ba joven sira, no mensajen saida ne’e too 12 Novembru mak Xefe Estadu hato’o.*Jos
