Akademista UNTL Konsidera Subsídiu Alozamentu ba Deputadu Sira Bo’ot Liu

Fahe Tutan

Naunil Media (Díli), Akademista Universidade Nasional Timor Lorosa’e (UNTL), Julio Alarico, husu Parlamentu Nasionál (PN) atu hamenus fundu alozamentu ba deputadu sira kada fulan hetan $450, karik bele hatuun tanba dadaun ne’e povu sei kontinua halerik ba dezenvolvimentu.

“Kada deputadu fulan ida hetan $450.00 osan alozamentu nian, deputadu ida bele hetan $5000 liu iha tinan ida, se konta hotu deputadu nain 65 tinan ida hira ona . Hau prefere hatuun ka hamenus fundu alozamentu, tau fali ba hadi’ak eskola sira iha area rurál”, Julio Alarico, ba Naunil Media, iha nia kna’ar fatin Kampus Lama, Kaikoli, Tersa (01/09).

Tuir Nia deputadu sira nia salariu báziku no subsídiu saúde nian, inklui transporte nian bele responde ona ba nesesidade baziku lor-loron nia.

“Sira (deputadu/a) nia salariu báziku ho subsídiu ne’e to’o hela para sira bele moris, agora ema hotu-hotu moris ho sira nia salariu de’it, hanesan ami professor sira, ami nia salariu de’it maibé ami sei bele halo uma ba ami nia an rasik no funsionariu nível I no II deit bele halo uma ba sira nia an rasik no balun to’o agora seidauk iha kapasidade atu halo uma ba sira nia an, tanba sa mak deputadu sira iha  previlejiu saida maka atu sai fali istimewa iha rai ida ne’e”, tenik Akademista UNTL ne’e.

Nia husu ba membru Parlamenru Nasional nu’udar reprezentante povu, atu haree uluk ba ba povu nia terus no la’os tau importansia uluk ba ninia án. Ivo

Leave a Reply

Your email address will not be published.