PNTL Tenki Servisu ho Profesionál Garante Situasaun Hakmatek
Naunil Media (Díli), Porta voz Polísia Nasionál Timor-Leste (PNTL), Superintendente Xefe Arnaldo Araújo, apela ba membru PNTL tenki servisu ho profesional hodi assegra situasaun iha teriotóriu Timor laran tomak la’o ho di’ak no hakmatek, tanba dadaun ne’e kazu hahú akontese iha fatin-fatin, hanesan Munisípiu Baucau, Díli no Ermera.
“Iha problema balun mak sei akontese hanesan asaltu malu iha Baucau Tirilolo ne’ebé rezulta ema nain lima sai vítima no suspeitu nain tolu daudaun polísia detein ona iha Munisipiu Baucau, husi asaltu malu ne’e hetan estragus ba komunidade nia uma lima hanesan harahun janela no odamatan, motivu husi suspeitu nain tolu ne’e tanba ho kondisaun lanu”, Porta voz PNTL, Superintendente Xefe Arnaldo Araújo, ba jornalista sira liu husi komferensia imprensa iha Quartel Jeral PNTL, Kuarta (09/09).
Porta voz PNTL, Superintendente Xefe Arnaldo Araújo, hatutan relasiona ho asaltu iha Díli entre joventude nain rua mak akontese iha edifísiu Sekretariu Estadu Joventude no Desportu (SEJD) nia oin ne’e, daudaun polísia kaptura no detein ona iha sela detensaun Díli Kai-Koli.
“Tuir fali mai asaltu malu entre arte-marsiais KORK no PSHT mak akontese iha suku Lisa Pat, postu administrative Hatulia, Munisipiu Ermera, daudaun ne’e mos polisia Ermera halo ona kapturasaun hodi halo prosesu tuir nia motive”. Flo/Emj5
