AJTL Fasilita Formasaun ba Radiu Komunidade Neén Kona-ba Prevensaun COVID-19

Fahe Tutan

Naunil Media (Díli), Segunda (14/09) ne’e, Asosiasaun Jornalista Timor Lorosa’e (AJTL) fó formasaun ba jornalista sira Rádiu Komunidade néen iha Díli no Munisípiu balun, kona-ba jornalizmu síviku no meius prevensaun Surtu COVID-19.

Prezidente AJTL, Zevonia Vieira, hateten formasaun ba jornalista sira husi rádiu komunidade neén (6), tanba radiu komunidade nu’udár orgaun komunikasaun social ne’ebe besik liu ba komunidade sira iha rural.

“AJTL servisu hamutuk ho Programa de Desenvolvimento das Nações Unidas (UNDP-Sigla Inglesh) ba projetu desentralizasaun atu haforsa no hametin sistema prevensaun COVID-19 iha nível nasionál no lokal (rural), tanba dadaun AJTL servisu besik liu ho Rádio komunidade sira mak besik liu iha  fronteira”, informa Zevonia, hafoin partipa iha programa formasaun iha Fatu-Hada. 

Nia esplika AJTL servisu hamutuk  UNDP hodi  fó formasaun ba jornalista lokal sira kona-ba jornalismu síviku no prevensaun COVID-19 liu husi radio komunidade sira.

Iha fatin hanesan reprezentante rádio komunidade Atumi Lifau Oe-Kusse, José Francisco Efi, haktuir formsaun ne’e kona-ba oinsa atu partila informasaun COVID-19 ne’ebé invade mundu inklui mai  Timor-Leste.

“Covid-19 ne’e ita hotu hatene katak iha nasaun vizinu Indonézia ho númeru kazu pozituvu ne’ebé a’as, risku mós ba  Timor-Leste tanba ne’e  husi formasaun ne’e bele partila ba komunidade sira”. tenik José.

Formasaun ne’e durante loron hahú 14 to’o 15 hetan partisipa husi radio komunidade Viqueque, Bobonaro, Covalima, Ataúru, Raeoa no radio komunidade Likisa.  Ivo/Emj8/emj6

Leave a Reply

Your email address will not be published.