PR Horta Sai Testemuña Ba Servicu Protesaun Civil
Naunil Media (Díli), Prezidente Repúblika (PR) José Manuel Ramos Horta sai Testemuña ba servisu Protesaun Civil tanba haree ho matan wainhira ekipa Protesaun Civil hala’o servicu iha dezastre no insendiu ne’ebé akontese tinan hirak liu ba.
“Ha’u hanesan testamunha direitu ba servisu ne’ebé diresaun jerál protesaun sivil halo iha dezastre ne’ebé foin lalais akontese, ha’u hare’e ha’u ho nia matan, sira nia servisu iha insendiu sira iha fulan Outubru tinan 2019 munisípiu sira Oeste nian, inundasaun 2020, inundasaun 13 Marsu 2021 4 Abril,” dehan Xefe estadu liu husi diskursu bainhira remata fo posse ba primeiru Prezidente Autoridade Protesaun Civil (APC) Ismael da Costa Babo iha Kaikoli, Kuarta, (29/06).
Xefe estadu mós agradese ba ekipa Protesaun Civil hotu ne’ebé servicu makaas ajuda vitima sira, tanba ne’e tuir xefe estadu presiza dezenvolve di’ak liu tan Protesaun Civil no mós transforma Protesaun Civil.
“Imi hotu halo servisu makaas ajuda vitima sira, ba imi hotu ha’u nia agradesimentu boot, ha’u mós hanoin protesaun sivil dezenvolve diak liu tan, hakat lalais liu ba oin liu bainhira ita hare ba kotuk, transformasaun protesaun sivil hetan dezafiu boot pandemia Covid-19, problema boot dezafiu ne’ebé ita hotu-hotu hare’e no sente mak Ismael Babo hatudu nia lideransa bainhira krize sira ne’e akontese, bainhira nia kaer protesaun sivil ha’u konfia nia bele kaer didiak,” katak xefe estadu
Aman ba nasaun ne’e fiar katak ho Prezidente Autoridade Protesaun Civil sei kumpri ho kbiit, onra hanesan uluk kedas tempu krize nia hatudu, PR mós husu ba professional autoridade protesaun sivil hotu ne’ebé servicu iha Prezidente Republika nia okos atu infrenta dezafiu foun ne’ebé mai.
Tanba ne’e ezije ba hotu-hotu ida-idak ho nia sakrifisiu matenek hatudu professionalizmu no fiar katak Protesaun civil bele kooresponde ba konfiansa ne’ebé Timoroan sira hotu-hotu tau fiar iha sira kabas ba hotu-hotu nia avenegasaun professionalizmu espiritu servi diak ba povu.*Jos
