PM Taur : 15 Outobru 2020 Governu Sei Haruka Proposta OJE 2021 ba PN

Naunil Media (Díli), Primeiru Ministru (PM), Taur Matan Ruak, haktuir reuniaun seminal ne’e, nia informa ba Prezidente Repúblika (PR), Francisco Guterres Lú Olo, kona-ba dadaun ne’e Governu konstitusionál da-ualu halo hela preparativu sira proposta Orsamentu Jerál Estadu (OJE) ba tinan-2021 atu haruka ba Parlamentu Nasionál (PN), iha 15 outubru tinan 2020 ne’e.

“Se ita bo’ot sira hatene, Orsamentu Jerál Estadu 2020 nian ami haruka tiha ona ba (Parlamentu Nasionál). Audisaun agora komesa ona. Ami prepara hela 2021 nian orsamentu atu haruka ba. Prazu tuir lei ne’e, 15 Outobru tenke tama iha Parlamentu Nasionál” informa Eis-Prezidente Repúblika no atual Primeiru Ministru Taur Matan Ruak.

Enkuantu, kona-ba pasajen illegal iha fronteira terrestres ne’ebé sai preokupasaun públiku ninian, Primeiru Ministru, Taur Matan Ruak, hateten medida mak reforsa no importante halo koopersaun ho país viziñu hanesan Indonézia.  

“Primeiru medida mak reforsa postu sira iha ne’ebá. Segundu mak halo koordenasaun ho País viziñu para reforsa liután atu impede ita-nian sira sai ba pasajen ilegal. Ita presiza kooperasaun husi Indonézia, tanba se ita-nia ba illegal sira simu, naturalmente, sira fomenta. Ita buka dalan halo nusa mak bele koopera ida ne’e di’ak liután”, salienta eis-gerileiru rejistensia, Taur Matan Ruak.

Terseiru, Matan Ruak, dehan sensibiliza ba sidadaun sira atu hatene katak iha regras tenke tuir, tanba la’ós di’ak ba Governu nian de’it, liuliu ba sidadaun sira, sá tan iha tempu moras COVID sei la’o no ikus-liu mak reforsa liu-tán seguransa atu labele ba mai ilegalmente.

Xefe orgaun ezekutivu Matan Ruak kontinua husu ba sidadaun sira kontinua koopera ho instituisaun estadu liuhusi hatudu nu’udar sidadaun ida ne’ebé responsável, hotu-hotu hamutuk hases Timor-Leste husi moras COVID-19.

Durante sorumutuk seminal ne’e mos, Primeiru Ministru Taur informa desizaun Konsellu Ministru nian kona-ba estensaun estadu emerjénsia ba loron tolu-nulu ba oin.

Kona-ba informasaun rejignasaun mak espalla iha públiku, Matan Ruak hateten atu rezigna-an oras ne’e tempu laiha ona.

“Sira mehi karik. Primeiru Ministru la rezigna an. Rezigna-an oras ne’e tempu laiha ona. Agora ha’u serbisu makaas loos lori orsamentu ba. Rezigna-an ba saída nian. Ne’e laiha ida, lalika fiar ida ne’e. Ha’u hanoin sira hamlaha uitoan karik”. Dehan Taur Matan Ruak. Pau/Emj9