Leonito “Defisiensia Matan” Fa’an Sasan iha Lurón Tanba Lakohi Tane Liman

Naunil Media (Díli), Leonito Da Costa Carmo ho kondisaun ‘defisiensia matan’ hosi munisípiu Liquiçá, dadaun ne’e fa’an sasan iha lurón, iha area Merkadu Lama, Centro de Convenções de Díli (CCD), hodi responde ba nesesidade lor-loron.

Leonito dadaun ne’e hela iha Fomentu, iha uma kos hamutuk ho família sira. Mane klosan ho kondisaun ‘defisiensia matan’ ho idade 34, husi munisípiu Liquiçá, lor-loron fa’an sasan iha lurón, iha area CCD.

Maske ho kondisaun ‘defisiensia matan’, maibe la sai obstaklu ba Leonito hodi luta ba nesesidade moris lor-loron, tanba prinsípiu ida lakohi tane liman ba inan-aman no ema seluk.

Iha Leonito nia toba kalan, dader rai nakaras manu fuik lian iha ai-leten, fanun Leonito mos hadér no hahú prepara sasan Tabako, Pulsa telemóvel no Aqua hodi ba fa’an iha Merkadu Lama, area CCD, Kaikoli.

Dader rai nakaras, mane ho kondisaun defisiensia matan ne’e leba nia Tabako, Pulsa telemóvel no Aqua, sa’e mikrolet sai husi hela fatin Fomentu, no tuku 07:00 otl, Leonito to’o iha fatin destinadu (area CCD, Kaikoli).

Sesta (25/09) ne’e, Naunil Media liu husi jornalista Ivonia Da Silva, hakbesik hodi hasee no husu Leonito hodi konta tuir ninia esperiensia durante fa’an sasan hodi responde ba nesesidade lor-loron.

Leonito Da Costa Carmo, hateten maske ho kondisaun defisiensia matan maibe ne’e la sai obstaklu ba nia, tanba lakohi tane liman ba ema seluk.      

“Dala barak, públiku nia presepsaun ba ema ho defisiensia mak ne’e, ema defisiensia sempre tane liman ka husu osan ba ema seluk mak bele responde nesesidade lor-loron nian. Hau nian prinsípiu mak ne’e, hau tenki buka rasik no lakohi sadere ba inan-aman, família no ema seluk, tanba lakohi rona ema hatete aát ‘matan aát’”, tenik Leonito.

Nia informa, aktividade negósiu ki’ik ne’e, la’o ona kuaze tinan ida, iha ne’ebe hahú fim tinan 2019 to’o ohin loron.

“Dalaruma loron ida hetan lukru $20.00 to’o $25.00, menus liu mak loron ida bele hetan de’it $9.00 to’o $10.oo”, dehan defisiensia matan ne’e  

Ikus, Nia husu ba joven sira feto-mane iha Timor laran, labele moe atu halo aktividade ne’eb’e pozitivu, tanba moris ne’e tenki no presija sakrifisiu.

“Joven sira atu eskola karik labele garantia demais inan-aman tamba dalaruma sira kbi’it la to’o, tenki buka rasik”. Afirma Leonito. Ivo