PD Apoiu VIII Governu Aseleira Dezenvolvimentu
Naunil Media (Díli), Prezidente Partidu Demokratiku (PR) atual deputadu Mariano Asanami Sabino, deklara PD apoiu VIII Governu atu aseleira prosesu dezenvolvimentu iha Timor-Leste (TL).
Prezidente PD atual deputadu Mariano Asanami Sabino, hato’o afirmasaun ne’e liu husi ninia intervensaun polítika ba debate jeneralidade Orsamentu Jerál Estadu (OJE) 2020, iha Parlamentu Nasional (PN), Kinta (02/10).
“Prinsipiu orsamentu atu fó kontinuasaun ba programa sira ne’ebé mak durante ne’e ita halo seidauk remata. Ha’u haree instalasaun eletrisidade barak mak seidauk iha no la remata sai hanesan diskrimisaun ida, tamba povu balun seidauk hetan eletrisidade. Maibé, povu balun la hetan, tan ne’e presija kontinua ba estrada sira ne’ebé mak seidauk remata”, hateten líder PD, Mariano.
Eis-Ministru Agrikultura no Peskas atual Deputadu PD ne’e relata, iha parte Zumalai suku ida ne’ebé besik ona eletrisidade sei falta de’it kilo 5, maibé orsamentu laiha, to’o agora povu seidauk bele asesu ba eletrisidade.
“PD sei a-favór ba OJE atu governu bele kontinua programa sira ne’ebé mak seidauk remata”, afirma Assanami Nia husu ba Governu atu fó prioridade ba bee moos no problema social sira iha Orsamentu Jeral Estadu iha kada tinan. Emj2
