Reprezentante Santa Sé iha TL Transmite-Mensajen Santo Padre ba PR
Naunil Media (Díli), Representa Santa Sé iha Timor-Leste Monsenhor Marco Sprizzi, Hateten enkontru ne’e hodi transmite mensajen Santo Padre Papa Francisco nian ba Prezidenti Repúblika (PR) Francisco Guterres “Lú Olo”.
“Enkontru ho Prezidenti ha’u transmite mensajen husi Santo Padre Papa Francisco nian, ne’ebé mak nia simu iha loron 2 fulan Juñu, hakarak hato’o ba autoridade masimu husi Timor-Leste no Bispu no povu Timor-Leste, no Papa mós komfirma katak nia iha vontade no hatan dala tolu ha’u sei ba, ha’u sei ba, ha’u sei ba, iha Timor-leste” dehan reprezentante Santa Sé iha Timor-Leste Monsenhor Marco Sprizzi ba Jornalista sira hafoin enkontru ho Prezidenti Repúblika (PR) Francisco Guterres “Lú Olo” iha Palásiu PrezidentI Nicolau Lobato Bairru Pite, kuarta (30/06).
Reprezentante Santa Sé ne’e hatutan, Santo Padre Francisco mós hato’o ba Jornalista sira liu husi intervista ne’ebé mak diferente, maibé ba Timor-Leste Papa hateten nia sei mai.
“Klaru katak ida ne’e mós depende ba evolusaun, tanba ne’e mak enkoraza ba hotu-hotu atu simu Vasina, nune’e bele proteze an, tanba preokupasaun Santo Padre nian presiza proteze an nune’e simu Papa hodi festeza hamutuk iha vizita Santo Padre nian, ho kondisaun no seguransa,” Katak nia.
Monsenhor mós partilla assuntu seluk ba xefe estadu Papa Francisco hato’o agradase ba Prezidenti Republika, Parlamentu Nasionál, Primeiru Ministru, no mós ba opozisaun no hotu-hotu iha parlamentu bele aprova mudansa ba lei imigrasaun de azilu nune’e bele kumpre kona-bá konkordansia data Timor-Leste ho Santa Sé iha Vatikanu, ne’ebé establese ba rezidensia ba misionariu sira nian.
Nia afirma rezidensia ba misionariu sira mós presiza renova kada tinan lima, maibé ida ne’e mós komforme ba akordu entre Vatikanu ho Timor-Leste.
“Parlamentu mak hanesan Orgaun soberania hodi aprova mudansa ba lei no kumpre ba ezijensia hodi permite misionariu sira ne’ebé mak hetan sertifikadu husi Bispo no embaizada no postura apostolika nune’e iha rezidensia ba Tinan 5, bele Renova hodi halao misaun Misionariu sira hodi haree no nesesita sarani ne’ebé fraku iha fiar”, tenik nia
Nia hateten, Papa mós hato’o agradese ba Prezidente Repúblika, parlamentu Nasionál no autoridade tomak inklui deputadu sira, nune’e bele realiza assuntu ne’e no Papa mós husu atu Proteze nafatin sidadaun sira husi moras pandemia Corona Virus.
“Papa mós akompaña situasaun kada loron no akompaña ho orasaun nune’e Proteze nafatin iha paz no harmonia iha rai doben ida ne’e”, hateten nia
Iha Enkontru ne’e Prezideni Repúblika Francisco Guterres ‘Lú Olo” mós hato’o agradese ba Papa Francisco ba nia mensajen tomak no xefe estadu, no konkorda mós kontiudu ba preokupasaun husi Papa nia ba kondisaun sanitaria ne’ebé presiza garantia seguransa bainhira Papa mai vizita Timor-Leste.* Jos
