Andre Mate Tara An iha Ai-Mutin
Naunil Media (Díli), Sesta (02/10) ne’e madrugada maiz ou menus tuku 6 ,, deskonfia Andre da Costa Silva ho idade 67, mate iha area Ai-Mutin, suku Komoro, postu administrativu Dom Aleixo, tanba tara an.
Tuir kronologia mak haktuir husi família no populasaun area refere, hetan iha oras tuku 6:00 madrugada ho kondisaun is kotu ona, tanba tali aperta metin vítima nia kakorok.
Segundu Komandante Polisia Nasional Timor-Leste-PNTL Munisípiu Díli, Superintendente, Euclides Belo, hatete ekipa PNTL Forensik tun diretamente ba iha fatin akontesimentu hodi foti mate isin (Andre) atu lori kedas ba autopsia.
“Katuas ida (Andre) ohin mate tara aan iha área Aimutin nia oríginal lolos hosi Laga-Baucau, dadaun ne’e PNTL sei halo investigasaun para bele hatene lolos motivu husi insidente ne’e”, Superintendente Euclides Belo, ba jornalista sira iha komando jerál PNTL, Kaikoli, Sesta (02/10).
Euclides informa, to’o oras ne’e parte PNTL rasik seidauk hatene klaru lolos motivu husi Andre nia mate tanba PNTL sei rekolla hela dadus husi sasin inklui família matebian sira.
“Ohin mate isin Andre lori kedas ba Ospitál Nasionál Guido Valadares (HNGV) hodi hein ekipa Polísia Forensiku Nasionál no mediku sira hala’o tiha autopsia hafoin entrega fali mate isin ba família sira”, tenik Euclides.
Matebian Andre moris iha Aldeia Samalari-Laga, Postu Administrativu Laga, Munisípiu Baucau, iha loron 7 Marsu 1953. Emj5/Flo
