PNTL Kapasita Membru KPK 60
Naunil Media (Díli), Polísia Nasionál Timor-Leste (PNTL) oferese formasaun ba membru Konsellu Polisiamentu Komunitária (KPK) hamutuk nain-60 husi suku Manleuana, postu adiministrativu Dom Aleixu, Munisípiu Díli.
Programa formasaun refere hala’o Komandu Jerál PNTL, Kaikoli, Tersa (06/10), atu hakbiit no sae konñesementu membru KPK sira ba àrea seguransa polísia nian iha komunidade nia leet.
Programa rea-treinamentu refere lansa husi Komandante PNTL Munisípiu Díli, Superintendente Xefe Henrique Da Costa, akompaña husi Segundu Komandante PNTL Díli, Superintendente Euclides Belo no xefe suku manleuna Jacob Tilman Soares.
Komandante PNTL Munisípiu Díli, Superintendente Xefe Henrique Da Costa, informa re-treinamentu hodi bele relembra kona-ba materia sira ne’ebé mak orienta KPK sira hodi serví ba iha komunidade sira.
“Agora ami fó hela rea-treinamentu ba membru KPK husi suku manleuana nian. Ami mós sei identifika tán suku seluk ne’ebé sedauk hetan treinamentu ida ne’e, atu bele fasilita sira hodi fó treinamentu”, dehan Superintendente Xefe Polisia Henrique.
Henrique hatutan, haree ba situasaun fasilidades sei halo hela parseiru ho Asia Fundation hodi prepara ba futuru prodúz kamizola ba membru KPK sira, atu ajuda KPK sira no involvimentu iha KPK ne’e husi joven, líder balun, veteranu sira no relíjioza.
“Prejensa KPK nian durante ne’e, sira hatudu rezultadu pasu pozitivu tebes ne’ebé sira apoiu ba servisu Polísia nian, iha suku sira hodi sente duni katak KPK nia prejensa ne’e importante teb-tebes”, tenik Komandante PNTL Henrique.
Iha fatin hanesan xefe suku Manleuna, Jacob Tilman Soares, haktuir programa ne’e hasa’e kuiñesementu hodi ajuda atividade seguransa KPK nian iha suku Manleuana.
“Presija fasilidade hanesan radio polísia nian no kamijola sira ba membru KPK sira. Bainhira sira (KPK) hakalma situsaun bele liga ba PNTL”, tenik lider suku Manleuana.
Jacob dehan, suku Manleuana totál aldea hamutuk 10 no destaka ona membru KPK sira ba kada aldeia. KPK presija fasilidade atu servisu tanba durante ne’e KPK barak mak sai vitima konfrontu no insidente sira. Emj5/Flo
