FEATUREDIkus LiuNewsSeguransa

Lere : Membru PNTL Fasilita Sidadaun Tama Sai Illegal iha Fronteira

Fahe Tutan

Naunil Media (Díli), Xefe Estadu Maiór Jenerál FALINTIL-FDTL, Majór Jenerál Lere Anan Timur,   preokupa tebes ho membru PNTL balun viola regra no envolve atividade ilegál iha fronteira hodi kontribui númeru sidadaun tama no sai ilegalmente.

“Halo seguransa mak viola fali regra, komandante no ajentes balun fasilita. Balun hasai ona no transfere ba parte Loro-sa’e” hateten Xefe Estadu Maiór Jenerál FALINTIL-FDTL, Majór Jenerál Lere Anan Timur, ba jornalista sira hafoin audensia ho Prezidente Repúblika (PR), Francisco Guterres ‘Lú Olo’, iha Palásiu Prezidensiál Nicolau Lobato, Bairu Pité, Kuarta (7/10).

Xefe Estadu Maiór Jenerál husu sidadaun sira konxiente kona-ba impaktu husi moras COVID-19 ba família no komunidade tanba bele hadaet moras ho lalais no hamate ema barak no preokupasaun ne’e bazeia ba númeru kazu ho COVID-19 ne’ebé aumenta maka’as iha país viziñu Indonézia, liliu iha parte Provinsia Nusa Tenggara Timur ne’ebé Timor-Leste fahe fronteira-rai maran.

Haree ba númeru pasajen illegal tama no sai husi Timor-Leste ne’ebé aumenta, Governu hasai ona medidas fortes ba estadu emerjénsia ba da-neen ‘sidadaun sira ne’ebé sai no tama Timor-Leste la kumpre regras, sei selu multa entre dolar tolu nulu no atus rua lima nulu no tenke selu rasik nia kuarentena’.

Xefe Estadu Maiór Jenerál, aproveita oportunidade refere, informa mos kona-ba iha tempu badak, F-FDTL sei koopera ho PNTL hodi provizoriamente koloka nia postu entre Laga no Baguia fó seguransa ba komunidade sira ne’ebé sente kontinua moris iha ameasa nia laran husi membru Grupu Arte Marsiais. Pau/Emj9

Leave a Reply

Your email address will not be published. Required fields are marked *