Klubu 24 Prontu Ona Parisipa iha Pra Liga Futsal
Naunil Media (Díli), Klubu hamutuk 24 prontu ona atu partisipa iha Pra Liga Futsal Timor-Leste époka dahuluk 2020/2021.
Sábadu (07/11) ne’e, klubu hamutuk 24 dada ona sorteu hodi kompete iha Pra Liga Futsal Timor-Leste no iha dada sorteu ne’e mós klubu sira aprezenta jersei rua hanesan home no away nian no mós aprezenta bandeira klubu nian.
Hafoin dada sorteiu, klubu rua ne’ebé sei jogu abertura mak Klubu Crazy Hourse sei kontra São Francisco Xavier iha loron14 Novembru 2020.
Sekretáriu Asosiasaun Futeból Salaun Timor-Leste (AFTL), Fernando Batista Xavier, apela ba komunidade amantes no animadores futsal namkari iha territóriu Timor-Leste atu bele partisipa no fó apoiu másimu ba eventu Pra Liga nu’udar eventu ofisiál dahuluk realiza iha Timor.
“Klubu 24 mak prontu ona atu partisipa iha eventu Pra Liga tinan ne’e” informa Fernando iha Xanana Sport Center, Bairu dos Grilhos.
Nia dehan, sei iha sansaun no multa ho koima sira ba Klubu maibé depende ba eru ne’ebé mak klubu sira komete.
Iha fatin hanesan Elizeu Isac, husi Klubu Maudoko, agradese ba Federasaun Liga Futsal Timor-Leste tanba realiza jogu Futsal ho formál iha Liga Futsal Timor-Leste tinan 2020/2021.
“Husu mós nafatin atu hala’o ida ne’e, tenke regras ne’ebé ita hotu-hotu diskute depois tenke mantein nune’e ba oin sai di’ak liu-tan”. tenik Nia. Dvo
