Arguidu PFS Arrepende no Tanis Hakoan Lejada
Naunil Media (Díli), Arguidu PFS husu deskulpa ho matan been ba lejada Flavia hanesan bin, tanba arepende ba nia hahalok neebé mak hatudu ba nia bin.
Tuir faktus neebé mak Ministériu Públiku (MP) akuja ba arguidu katak, iha loron 28 fulan Janeiru tinan 2020, iha oras tuku 18 lorokraik lejada iha hela nia uma, iha Becuse sentru, Suku Becora, Postu Administrativu Kristu Rei Munispíu Díli.
Arguidu foti popok foer hodi soe fali ba lejada nia uma oin, nunee lejada hase nia dehan tan saida mak soe fali popok nee mai ami? lejada mós foti popok foer nee soe fali ba arguidu nia dapur laran.
Tuir mai mosu diskusaun entre sira nain rua, arguidu foti hikas popok foer hodi hakbesik ba lejada, kaer iha nia fuuk silu ba kotuk hodi riba ba rai. Hafoin sama iha nia ain kelen, lejada sente moras no bubu. Tuir mai arguidu kaer popok sena ba lejada nia ibun halo lejada dada iis labele.
Konsekuensia husi arguidu nia hahalok, halo lejada sente moras, bubu no mean iha parte kelen, entaun lejada hetan tratamentu iha Hospital Nasionál Guidu Valadares (HNGV).
Iha sala julgamentu lejada konfesa ba tribunál katak, nia prontu atu dame, maibé arguidu hakarak ka lae? Dame, maibé lakohi ema soe lia, lahusu tuir, mai hatudu asaun deit. Aleinde nee, lejada dehan bele dame maibé ho kondisaun hodi rekoñese sala tuir kultura.
Hau hakarak dame maibé fila-fali ba nia, hakarak ka lae? Hau prontu atu dame, maibé hau lakohi ema soe lia, mai lahusu tuir, halo asaun deit mai hau, nee ma hau lakohi. Maibé dame tuir kondisaun kultura Timor, tenke taka hau nia moe, tanba nia tolok no trata hau, dehan lejada ba tribunál iha sala julgamentu tribunál Distritál Dili, kolmera, 04/02/2021.
Aleinde nee, arguidu PFS mós deklara ba tribunál katak, antes kaju iha Polisia atu dame, maibé lejada lakohi too tribunál. Entaun arguidu hakarak no prontu atu dame tuir estadu, maibé kultura nee parte ketak.
Husi inísiu kazu iha Polisia haruka dame maibé nia lakohi, maibé hau konkorda no prontu atu dame tuir estadu, kultura nee iha parte seluk, hatoo arguidu.
Tuir Ministériu Públiku nia alegasaun katak, haree ba natureza krime, krime nee semi públiku, tan nee husu ba arguidu labele repete tan hahalok nee, tanba arguidu nia naran vistu ona iha MP. Maibé defeza nia alegasaun ba arguidu, sente katak ba futuru mai, sei la akontese tan hanesan nee, tanba arguidu ho lejada feton ho naan.
Tribunál hatun sentensa ba krime Ofensa ba integridade fízika simples neebé mak previstu iha artigu 145 kp, iha nu.2 koalia konaba prosedimentu krime depende ba keixa. Aktu hotu-hotu iha tribunál nia oin la viola lei. Tanba nee tribunál homolonga no absolve arguidu husi krime neebé mak MP imputa ba arguidu.
Prosesu julgamentu nee prejidi husi juis singular Argentinho Neves, Ministériu Públiku reprezenta prokuradór jerál Domingos Barreto, arguidu hetan asistensia legal husi defensor públiku Estaqui Guterres. Rit