Carascalão: Timor-oan Na’in 73 Fila Husi Malázia To’o Iha TL
Naunil Media (Díli), Reprejentante Ajensia Viajen, Pedro Carascalão informa, timor-oan 73 to’o ona iha Timor-Leste tuku 8:05 dader otl, ho aviaun Malindo marka tipu boeing B737-800/9 M-LNP husi nasaun Indonézia voo hosi Malázia mai Díli.
“Timoroan 73 iha rai liur deside fila mai Timor-Leste, tanba hasoru problema oin-oin. sidadaun ida ne’ebé maka iha loron 31 fulan Abríl atu ba Korea. maibé nia pasaporte hela de’it fulan 8, entaun ema tahan iha Malázia ne’ebá. Tuir imigrasaun Malázia dehan loron 16 nia tenke sai, sé nia lasai entaun nia tama prizaun imigrasaun to’o hetan aviaun ida para deporta fali mai. entaun ita esforsu para alin ne’e labele hasoru situasaun ida ne’e”, dehan Reprejentante Ajensia Viajen, Pedro Carascalão ba jornalista sira iha aeroportu internasionál Nicolau Lobato, Komoro, domingu (18/04).
Pedro hatutan, Timor oan barak iha Belfas, Londres, husi SEFOPE hamutuk 35, Lisboa, iha balun servisu iha Indonézia sira maioria fila tanba sira nia família hetan impaktu husi inundasaun foin dadauk ne’e.
Iha fatin hanesan Diretór Aeroportu Dili, Lourenço de Oliveira haktuir, parte Aero Dili koopera hamutuk ho ajensia viajem atu fasilita sidadaun sira ne’ebé maka hala’o viajen.
“Ita-nia lei tenke kompana ida maka tenke responsabiliza, entaun ami foti desizaun hodi aero Dili maka responsabiliza. Ho nune’e horibainrua ami trata dokumentu ba Ministeriu negosiu estranjeiru, ba fali iha jestaun krize, ba Ministeriu transporte nian. entaun ami hetan aprova maka ohin aviaun tun”, Diretór Lourenço realsa.
Nia informa, ba oin fulan ida aviaun sei semo dala rua, hodi bele fasilita sidadun sira ne’ebé maka ba mai. Atu bele fasilita maluk sira ne’ebé maka servisu iha liur atu ba mai. Tanba husi Malázia iha koneksaun kapas liu. Presu bileti tanba iha situasaun nia laran, maibé sira buka meius oinsa para hodi bele fasilita malu.
“ita atu koalia konaba presu bilete ne’e, ita labele menuntukan, so buat hotu la’o normál maka ita bele ko’alia presu. Agora dadaun ne’e ita hotu halo favor ba malu ou atu esplora malu. Se aero lakohi mai karik halo nusa para aerolone mai, ita aviaun laiha hodi uza ema nia aviaun ne’e” nia informa.
Nia dehan, Pasajeiru sira ne’e, sei kumpri regras protokolu saude husi OMS, sei ba Tama kuarantina ne’ebe maka Governu prepara ona hanesan hotel Ramelau, Hotel Timor no seluk Tan. Ipe/Rit
