FMTL lamenta F-FDTL-PNTL Baku Pasiente Covid-19
Naunil Media (Díli), Relasiona mosu dezentendementu iha kuarente Same no Kovalima, From Mahasiswa Timor-Leste (FMTL), lamenta ho aktu krime ne’ebé oknun Falintil Forsa Defesa Timor-Leste (F-FDTL) no Polísia Nasionál Timor-Leste (PNTL) baku pasiente covid-19, iha Kuarentina munisípiu Manufahi no Kovalima.
Tuir porta Voz Francelina Piedade haktuir bazeia ba akontesimentu loron 15 fulan Abríl iha Munisipiu Manufahi no loron 17 fulan Abril iha Munisipiu Kovalima ne’ebé maka parte seguransa iha liña frente PNTL no F-FDTL hatudu aktu krime hodi baku no uza gas lakrimozeniu ba pasiente sira.
“FMTL lamenta tebes ho aktu rua refere, tanba la obedese mata dalan ba evakuasaun mediku husi SIJK no OMS, maibé aktu ne’e halo husi membru PNTL no F-FDTL, entaun indikasaun ne’e ba violasaun prinsipiu direitus umanus, inklui hatudu atitude la profisionál hanesan servidor ba estadu hodi servi povu maubere”, porta Voz FMTL Francelina Piedade ba jornalista sira liuhusi komunikadu imprensa, iha kampus lama, Kaikoli, kuarta (21/04).
Porta voz ne’e afirma, FMTL ninia polítika ba interese povu maubere liu-husi komunikadu Imprensa hanesan ofertoriu pasifika ida, hodi bele hasa’e empenamentu servisu SIJK nomós PNTL ho F-FDTL nia iha terenu hodi garantia interese públiku iha ámbitu kalamidade serka Sanitária nian laran.
“Ho pontus intervensaun sira iha leten, FMTL nu’udar liman-ain povu Maubere aprezenta rekomendasaun ba parte sira atu bele tau atensaun ba servisu iha terenu hodi garante nafatin valores prinsipiu Diretus Umanus”, FMTL rekomenda.
Iha fatin hanesan membru FMTL Herculano Asala Vicente hatutan, governu tenke toma atensaun ba hahalok sira ne’e tanba laiha ema sivil ida maka nia forsa liu fali seguransa sira, tan ne’e tenke respeita mós Diretu umanus.
“Ita-nia seguransa sira liu-liu Forsa ho PNTL ne’e atende tenke respeita ba direitu umanus, agora dehan distansia sosial, maibé agora tuku malu moras ne’e daet ga lae? Ha’u lafiar membru PNTL ho F-FDTL laiha kapasidadae atu atua maluk sira iha izolamentu. ita-nia ema sira iha izolamentu ne’e laiha arma ga laiha forsa ida para atu hasoru membru seguransa. Laiha ema sivil ida nia kapasidade liu milítar. ha’u bele dehan ita-nia membru oknun sira ne’e la profisionál”, Herculano esplika.
FMTL konsidera, aktu ne’ebé komete husi membru PNTL no F-FDTL hasoru pasiente covid-19 ne’e no sidadaun iha kuarentina Manufahi no Kovalima konsidera nu’udar krime Ofensas integridade fizika simples ne’ebe hatur iha artigu 145 kodigu penal.Rit/Yna
