António: 2023 Governo Sei Rekruta PNTL Hamutuk 720

Naunil Média (Díli),Vise Ministru Interior (MI), António Armindo, hateten, Governo sei rekruta membru Polísia Nasionál Timor-Leste (PNTL) hamutuk atus hitu-rua-nulu (720) iha tinan 2023, hodi bele fó apoiu ba unidade no komandu Munisípiu sira ne’ebé membru sei menus.

“Iha 2022 Governo hakarak rekruta PNTL atus hitu-rua-nulu (720), maibé la konsege. Entaun iha 2023 ne’e tenke rekruta ona, Hau lakohi atu ko’alia de’it, maibé rekrutamentu ba membru PNTL ejatamente tinan ne’e, la rekruta tinan oin tenke rekruta.

Tanba, ita haree ba realidade ne’ebé maka iha, polísia hasoru ona problema ne’ebé bo’ot ida no sira menus ona sira nia ema, kuantidade ema la prienxe ona, hakarak ka lakohi, pelumenus iha tinan 2023 tenke rekruta ona, atu bele kompleta membru PNTL sira iha unidade no ba komandu Munisípiu sira ne’ebé durante ne’e sei menus hela,”dehan VMI António, iha edifisiu Ministériu Interino, Vila-verde, Sexta feira (11/02).

Vise Ministru hatutan,Iha Prosesu rekrutamentu ne’e, iha ninia planu ba orsamentu ne’ebé lori ona ba komisaun revizaun orsamentu politíka (KROP) iha tinan 2021, maibé la konsege, parese proposta mai husi komandu no husi Ministériu Interior nia montante sei hanesan, tanba ne’e, ema menus ona.

“kuantidade ne’ebé ita aprezenta ba KROP, Iha 2023 ida ne’e maka sei propoin, maibé ha’u sei konsulta lai ho Primeiru Ministru (PM) nu’udar Ministru Interior, nia konkorda ka la konkorda, tanba naturalmente la’os ha’u-nia desizaun, ne’e Ministru nia desizaun”, nia esplika. Ana