FONGTIL Aprezenta Rezultadu Monitorizasaun ba CAC Kona-bá Kustu Hotel
Naunil Media(Díli), Forum ONG Timor-Leste (FONGTIL), Daniel dos Santos, Informa kestiona ba kustu Hotel ne’ebé mak la hanesan no hahan balun ne’ebé mak ladun di’ak ba pasiente Covid-19 iha kuarentina, hato’o ba Comição Anti-Corrupção (CAC sigla portugés) hodi halo Monitorizasaun.
“Ami mós mai hato’o ami-nia rezultadu monitor ba informasaun balun ami partilla ho CAC kona-bá kustu aluga hotel iha Díli laran no to’ o iha Manatutu fatin izolamentu nian, tanba kustu ne’e variedade oi-oin, Hotel balun karun kustu balun $40, $30, balun to’o $80 loron ida, entaun ne’e osan sira ne’e mai husi oramentu jerál estadu OJE. Entaun públiku tenke hatene, tanba iha lamentasaun barak husi polpulasaun kona-bá Hotel lasufisiente, hahan balun sin, han latuir oras, entaun ami kestiona kompana sira ne’ebé fornese hahan nomos Hotel nain sira ne’ebe fó aluga ne’e liuhusi prosesu ga lae? ka buka de’it telfone malu tanba kolega ne’e maka aluga nia Hotel ga oinsa?, entaun ami hato’o ba CAC atu halo monitorizasaun oinsa atu detekta prosesu sira ne’e la’o tuir nia dalan ga oinsa? tenke loke investigasaun”, Dehan Diretór FONTIL Daniel dos Santos ba jornalista sira iha edifisiu CAC Farol, tersa (08/06).
Nia hatutan, tinan kotuk governu husu atu halo preparasaun ba fatin izolamentu ba Covid-19, maibé to’o numeru aumenta ba beibeik governu aluga hotel ho presu ne’ebé lahanesan, tanba ne”e maka FONGTIL kestiona hodi husu ba CAC atu investiga klean.
“Tanba osan lubuk ida ne’ebé tinan uluk governu husu atu halo preprasaun ba kazu emfetadu Covid-19 sae, maibé no fim to’o númeru kazu sae ita laiha fatin izolamentu tenke hasai osan bara-barak hodi aluga. Entaun ita kestiona kustu sira aluga Hotel bara-barak iha Dili laran”, Nia hato’o.
Aleinde ne’e Komisariu Comição Anti-Corrupção (CAC) Sergio Hornai hatutan, sira la’o hela monitorizasaun maibé seidauk halo relatoriu kona-bá preukupasaun sira ne’e.
“Ita halo hela monitorizasaun maibé ita seidauk konklui relatoriu, entaun variasaun ne’e presu husi fatin ida ba fatin seluk lahanesan tanba nia kondisoens”, informa komisariu.
Komisariu realsa, labele halo konkluzau agora, tanba tenke apura atu bele iha serteja loloos hodi identifika ninia faillansu ou iregularidade ne’e iha ne’ebe? tanba iha ekipa ida monitorizasaun nomós estudu avaliasaun, entaun sira halo hela vijilansia, ekipa sira ne’e nia rezultadu mak bele konklui hodi halo estudu análiza hafoin halo konkluzaun hodi rekomenda, karik iha aktus iregularidade ba iha kriminalidade ninia.Rit
