FALINTIL Susesu Labele Haluhan Sira-Nia Kontribui Frente Armada
Naunil Media (Díli),Forsa Armada Libertasaun Nasionál Timor-Leste (FALINTIL) luta tinan 24 nia laran hetan susesu, la ses husi kontribuisaun estafeta iha prosesu funu, tanba sempre hasoru risku iha kualkér momentu.
Prezidente Parlamentu Nasionál, Deputadu Aniceto Longuinhos Guterres Lopes hateten, ho prinsípiu Povu nian atu liberta-an husi kolonizasaun ho okupasaun estranjeira mak FALINTIL kaer metin luta armada ba libertasaun Nasionál ho kbi’it rasik, nakonu ho barani, disiplina, espíritu sakrifísiu, domin ho dedikasaun tomak.
“Bainhira ita ko’alia kona-ba FALINTIL ninia susesu, ita labele haluha sira ne’ebé kontribui ba Frente Armada, nu’udar estafeta liu-husi kna’ar klandestina sira seluk. Tanba ne’e, sira mós dedika-an ho sakrífisiu oi-oin no tau sira-nia an iha risku bo’ot,”dehan Prezidente Parlamentu Nasional, iha sermonia FALINTIL Fatuhada sexta, (20/08).
Prezidenti parlamentu hatutan, iha loron espesial ba FALINTIL nia hanoin mós ba Buibere sira ne’ebé maka dedika an ba iha funu tinan 24 lara.
“Iha aniversáriu ba loron ohin ne’e, tenke temi mós Buibere sira-nia apoia ba FALINTIL, la’os Buibere barak maka kaer kilat ajuda FALINTIL, maibé sira-nia apoia inkondisionál kontinua funu.
Barak tebes maka fó sira nia vida no família nian, iha vila okupada sira, uza sira-nia hela fatin rasik nu’udar sentru apoiu lojistíku ba FALINTIL sira iha ai-laran, kompatriota feto barak sai ponte ligasaun entre Frente Armada, Frente Klandestina no Frente Esterna.”,nia esplika. Ana
