“Lú-Olo,” Rai Memoria Max Stahl, Momentu Hamutuk Hori Uluk Hato’o Ba Malu
Naunil Média (Dili), Prezidente Repúblika (PR), Francisco Guterres “Lú-Olo,” Informa, sei rai hela memoria Max Stahl nian, ne’ebé uluk sira rua hato’o ba malu iha momentu di’ak no horiuluk hamutuk.
Xefe estadu hato’o lia hirak ne’e liu husi Mensajen ba Max Stahl nia mate ne’ebé, Naunil Média asesu iha Pagina Official Média Prezidensiá Repúblika, Kinta, (28/10).
“Ho ha’u nia naran rasik no nu’udar Prezidente Repúblika, ha’u hetan previléjiu no onra hetan malu ho Max Stahl, Iha ha’u-nia memória, ha’u sei rai metin lia-fuan sira ami nain rua hato’o ba malu no momentu diak hori-uluk hamutuk”,dehan PR Francisco Guterres “Lú-Olo”
Xefe estadu mós fó-sai nia rekoñesimentu ba buat hoto-hotu ne’ebé Max Stahl halo ba País no Povu, molok no hafoin rastaura Timor-Leste nia independénsia, nu’udar ema ida kaer-metin Kauzas no Valores.
Aman ba nasaun ne’e ho laran taridu tebes mak simu notísia katak irmaun no kompatriota Max Stahl la iha ona.
“Ha’u sente katak parte ida husi Timor-oan sira ba mós ho irmaun Max Saudade ne’ebé ami hotu sente ohin sei rohan-laek”, tenik nia
Prezidente Repúblika mós hato’o sentidus pézames ba família saudozu Max Stahl, ne’ebé sempre hamriik metin ho nia husi tempu ne’ebé koñese iha Timor-Leste.*Jos
