PM:Taur Reuniaun Virtual Ho Banku Mundial
Naunil Media (Díli), Primeiru-Ministru Taur Matan Ruak, Informa ohin hala’o reuniaun virtual ho Banku Mundial (BM) nia Vise-Prezidente foun ba Leste Aziátiku no Pasífiku, Manuela V. Ferro, hodi ko’alia kona-bá komitmentu entre Timor-Leste no Banku Mundial nian ba prosesu dezenvolvimentu nasionál.
Iha reuniaun virtual ne’e, xefí Governu aproveita fó parabéns ba Vise-Prezidente BM ba nia kargu foun refere, no revela polítika dezenvolvimentu nasionál nian, ko’alia mós kona-ba inseguransa ai-han no nutrisaun nian no planu rekuperasaun ekonómika pós Covid-19.
“Inklui hanoin balun oinsá atu hamenus levantamentu ba Fundu Petróleu ne’ebé daudaun ne’e hanesan únika fonte ba Estadu Timor-Leste ho subtitui polítika hasa’e impréstimu nian atu nune’e bele garante sustentabilidade Fundu Petrolífera nian ba tinan Covid-19”, Dehan PM Taur Matan Ruak ba jornalista sira iha palásiu do Governu, tersa,(23/11).
Aleinde ne’e, Xefí governu mós aproveita agradese ba apoiu Banku Mundial nian durante ne’e no konvida Vise-Prezidente BM atu vizita Timor-Leste iha fulan-janeiru tinan oin, tanba Timor-Leste iha planu sei organiza semináriu alto nivel ida kona-ba malnutrisaun iha Díli, ne’ebé presija hetan apoiu hosi parseiru internasionál sira.
Entretantu Vise-Prezidente BM ba Leste Aziátiku no Pasífiku, introduz nia an ba Xefí Governu no introduz mós nia ekipa iha Jakarta no Díli, no kontinua diskusaun ho Xefí Governu kona-ba komitmentu entre Timor-Leste no Banku Mundial nian ba prosesu dezenvolvimentu nasionál.
Enkuantu Kona-bá polítika rekuperasaun ekonómika nian, Vise-Prezidente BM ne’e apresia tebes ho polítika refere no hateten Banku Mundial apoiu tebes inisiativa refere, no inisiativa seluk kona-ba hamenus levantamentu ba Fundu Petrolífera ho hasa’e fundu impréstimu.
Manuela V. Ferro realsa, Banku Mundial sei kontinua disponivel atu apoiu Timor-Leste iha área hotu-hotu liuliu iha inseguransa ai-han no nutrisaun nian, no hein katak Timor-Leste bele aproveita di’ak apoiu refere ba benefísiu povu Timor-Leste. Ana
