Taur Husu Joven Sira Labele Oho Malu, Tuda Malu Beibeik
Naunil Media (Díli), Primeiru Ministru (PM) Taur Matan Ruak, husu ba foin sa’e sira katak bele iha diferensia, maibé labele oho malu, labele baku malu, labele tuda malu nune’e halo buat di’ak ba ema hotu.
“Ha’u halo apelu boot ida ba ha’u nia oan foin sa’e ita bele iha diferensia mas civizmu respeitu edukasaun ne’e importante, entaun favor ida labele oho malu labele baku malu labele tuda malu, iha buat seluk ne’ebé ita halo di’ak ba ita hotu duké tuda malu no balu malu”, dehan Xefí Governu Taur Matan Ruak ba jornalista sira hafoin enkontru ho Prezidenti Repúblika (PR) Francisco Guterres “Lú Olo” iha Palásiu Prezidensiál Nicolau Lobato Bairru Pite, Kinta (03/02).
Xefí governu ne’e mós lamenta no triste bainhira haree joven sira lahatene katak nasaun ne’e jerasaun foun sira nian, maibé triste bainhira joven sira lori fali nasaun ne’e ba rai naruk.
“Ha’u lamenta loos ha’u triste loos tanba haree ha’u nia oan foin sa’e sira hanesan ita boot sira hatene nasaun ida ne’e se nian ne’e jerasaun foun sira nian mas ami triste fali kuandu jerasaun foun para foti nia riba tun fali ba rai naruk ne’e ami triste loos”, katak Taur.
Taur hatutan, Uluk sira nia idade sei 18, 19 anus partisipa iha funu ho aktual Prezidenti Repúblika no mós maun bo’ot Xanana sira idade ne’ebé sei joven mak halo funu.
Nia dehan, Uluk sira matenek la barak situasaun aat liu mas sira hadomi loos Timor, maibé ohin ne’e joven sira ladún hadomi rai ne’e.
Iha enkontru ne’e Prezidenti Repúblika mós fó Mensajen ba Primeiru Ministru mak paz no estabilidade iha rai laran, tenke iha no PR kontra ema sira ne’ebé iha intensaun atu destabiliza rai. * Jos
