Lansamentu Ofisial Kandidatura Número Sorteio 16 Bá PR Períodu 2022-2027
Naunil Média (Díli),Partidu Demkorátiku (PD), hala’o serimónia lansamentu ofisiál konaba Kandidatura Prezidente Repúblika períodu 2022-2027, Mariano Assanami Sabino ba povu tomak iha Tasi-Tolu,Munisípiu Dili.
Tuir Kandidatu ho númeru sorteiu 16 nia deklarasaun nakonu ho mensájem unidade, tamba sei halo mundansa ba mentalidade no atitude polítika ne’ebé la kontribui bá unidade país nian.
‘’Ha’u mai atu halo mundasa ba mentalidade no atitude politika no sosiál sira ne’ebé la-kontribui ba unidade pais nian.Ha’u hakarak kria ambiente polítika di’ak hodi Timor-oan tomak bele partisipa di’ak liu tan iha dezenvolvimentu ida integradu, sustentavel no inkluzivu’’, dehan, Assanami iha nia Diskursu ba lansamentu ne’ebé hala’o iha Tasi-Tolu, Domingo, ne’e, (20/02).
Nia hatutan, Prezidente Republika (PR) nu’udár aman ba Nasaun no aman ba Povu,ho nune’e, bainhira Assanami eleitu sei promove no hametin Timor-Leste ida fraternu, solidáriu no unidu.
‘’Bainhira Eleitu, ha’u sei Promove no hametin liu tan Timor-Leste ida fraternu, solidariu, unidu, hodi atinji sosiedade ida justu,prosperu no inkluzivu, haburas atitude respeitu malu entre Timor-oan sira, respeitu ba diferensia iha opiniaun politika, fiar no prátika kultural no tradisaun sira. Ho nune’e de’it maka ita bele dignifika Timor-oan sira hotu nudar Povu, Nasaun, no Estadu’’, Assanami esplika.
Nia akresenta, mudansa no transformasaun hahú husi agora, labele hein tan, hein tan katak kontinua hanaruk ímpase polítika, hanaruk odiu no vigansa, hanaruk fila kotuk ba malu, hanaruk fahe malu, hanaruk moris iha susar no kiak, no halai do’ok liu tan husi Konstituisaun RDTL.
“Mai hamutuk, ho fuan no laran, vontade no domin ba ita-nia rain doben Timor-Lest, Ita hamutuk, ita muda polítika iha Timor, Timor ida ne’ebé hun ida, abut ida, Povu ida, Rai Timor ida-de’it, Timor ida ne’ebé fraternu, solidáriu, unidu, justu, no prósperu liu tan. Timor ida ne’ebé respeita ho los no lolos Konstituisaun RDTL’’,Atual membru Parlamentu Nasionál ne’e relata .Ana
