PR Lú Olo Vota Atu Hametin Estadu Direitu Demokrátiku

Naunil Media (Díli), Prezidente Repúblika (PR), núdar mos rekandidata nia-àn ho númeru sorteiu 6, Francisco Guterres “Lú-Olo”, hateten vota atu hametin estadu direitu demokrátiku, hadi’ak no halo dezenvolvimentu ba moris povu nian.

“Ha’u nia deklarasaun de votu mak, hanesan ha’u hateten ona iha kampaña iha Debate, ha’u vota para atu hametin ita nia estadu de direitu Demokrátiku hodi hadia no hala’o dezenvolvimentu ne’ebé sustentavel para hodi bele povu nia moris di’ak”, dehan Xefe estadu Lú Olo ba Jornalista sira hafoin tuir votasaun iha sentru votasaun EBC númeru 01 Farol, Sabadu (19/03).

Lú Olo hanesan mós kandidatu ba Prezidente Repúblika periodu 2022-2027 fo mensajen ba ekipa sira halo servisu di’ak nune’e bele halo apuramentu loloos ba rezultadu votasaun.

“Mensajen ligadu ba kontazen de votus, ha’u haree katak ekipa sira iha ne’e sira sei halo sira nia servisu ho di’ak para nune’e atu halo apuramentu loloos ba rezultadu ne’ebé mak ohin loron ida ne’e ema hotu-hotu ba husik hela sira nia votus”, apela Lú-Olo

Aktual Prezidente Repúblika ne’e mós fiar katak sei manán no husik povu nia votus mak sei konfirma no epela ba ema hotu bele iha vontade tanba se mak kompete prontu simu manán no prontu simu lakon.

“Ha’u hateten katak ha’u fiar metin ba ida ne’e, husik ba povu nia votus mak sei konfirma, tanba ne’e militante no simpatizantes  sira ne’e sempre simu hela rezultadu saida de’it, agora ha’u hakarak apela ba hotu-hotu para bele iha vontade ida ne’e, no Se mak konpete ne’e prontu para manán no prontu para lakon, mas ha’u dehan katak ha’u sei manán”, katak aktual PR

Nia dehan tempu kampaña hotu ona agora hein sura votus hotu ida ne’ebé mak manán nia mak sai Prezidente Repúblika no Prezidente Repúblika ba ema hotu mós ba povu tomak.

Totál eleitór iha suku Motael humutuk 4.939 no iha suku ne’e rasik fahe ba Sentru votasaun haat (4) mak hanesan  EBC númeru 01 Farol, Sentru Juventude Bebora, Sede Suku Motael, no MTCI Bebora.*Jos