Veteranu Sakarai Husu PR Foun Lori TL Ba Mundu
Naunil Media (Bobonaro), Sekretáriu Ezekutivu Konselho Veteranu Munisípiu Bobonaro, Moises Ramos ‘Sakarai’, iha esperansa ba Prezidente Repúblika (PR) ne’ebé sei eleitu atu lori Timor-Leste ba mundu, liu husi promove rekursus sira Timor nian.
“Esperansa bá Presidente Repúblika foun, que matenek bele influnsia mundu. Ha’u fiar katak povu matenek ona hodi hili ema númeru um iha rai ida ne’e”, Veteranu Sakarai ba jornalista sira iha sentru votasaun EBC Leo-Hitu, Sábadu (19/03).
Sakarai hateten, nu’udár veteranu sempre fó hanoin ba sidadaun sira atu ezerse sira nia direitu votu iha loron votasaun, ho situasaun hakmatek no buat la’o di’ak hodi fó susesu ba festa demokrasia.
“Ita la impede, hanesan veteranu ami nafatin fanun no fó hanoin bá povu atu partisipa iha festa demokrasia hodi hili nia-prezidente rasik”, tenik nia
Ikus, Nia husu PR foun atu garante paz no estabilidade, garante dezenvolvimentu hodi hasai povu husi ki’ak no mukit, liu husi kria kampu servisu ba joven sira. Ana
