Komisariu Faustino Aprezenta Preparasaun PNTL Ba Loron 20 Maiu ba PR
Naunil Media (Díli), Komandante Jerál Polísia Nasionál Timor-Leste (PNTL), Komisariu Faustino da Costa aprezenta preparasaun polísia nian bá serimónia 19 Maiu no 20 Maiu nian ba Prezidente Repúblika (PR).
Komisariu Faustino da Costa hato’o lia hirak ne’e ba Jornalista sira hafoin enkontru semanal ho Prezidente Repúblika (PR), Francisco Guterres “Lú Olo” iha palásiu Prezidensiál Nicolau Lobato Bairru Pite, kinta (28/04).
“Ha’u dehan de’it katak komandu ha’u ho segundu ami nain-2 halo enkontru atu aprezenta de’it situasaun jerál territóriu nasionál la’o di’ak liu liu saida mak PNTL sei halo preparasaun ba iha serimónia iha 19 Maiu no 20 Maiu ninian, ne’e mak ami aprezenta ba Prezidente Repúblika”, dehan Komisariu Faustino da Costa
KOMJER hatutan, Preparasaun ba tomada de posse durante ne’e Prezidente Repúblika rasik mós informa hela katak Xefí estadu hira mak Prezidente Repúblika konvida mas depois ba oin.
Faustino hateten, PNTL sei kordena nafatin katak konfirmadu Xefí estadu sira ne’e hira hanesan mós xefe governu para nune’e komandu bele fó orientasaun para prepara membru sira ba eskolta tantu mós ekipamentu nesesariu, aleinde ne’e haree mós normalmente kuandu xefe estadu mai protokolu ne’e klaru ke diferente uituan.
Nia dehan, to’o agora PNTL seidauk lista VVIP hira ne’e seidauk klaru, maibé sei hein komisaun bainhira mak polísia bele hetan lista klaru husi VVIP sira tanba komandu lakohi fo kuandu lista seidauk klaru.
Iha enkontru ne’e Prezidente Repúblika mós hato’o mensajen no nafatin agradese ba servisu ne’ebé Polísia halo durante ne’e, no husu para mantein servicu ne’e no mós liuliu ba iha dia 19 Maiu no 20 Maiu ninian. *Jos
